Atyraýda kólik qaqqan jasóspirimniń biri aýrýhanada jatyr

ATYRAÝ. QazAqparat – Atyraýda kólik qaqqan eki jasóspirimniń biri aýrýhanada jatyr. Onyń birneshe jaraqaty bar, dep habarlaıdy QazAqparat tilshisi.

Jol-kólik oqıǵasynan zardap shekken jasóspirimniń biri jedel járdem brıgadasymen oblystyq balalar aýrýhanasyna jetkizilgen. Al, ekinshi jasóspirim dárigerlerdiń kómegine júginbegen.

«Oblystyq balalar aýrýhanasynda 2004 jyly týǵan jasóspirim qyz jatyr. Naýqastyń densaýlyǵyna kompıýterlik tomografııamen zertteý júrgizildi. Onyń birneshe jaraqaty bar. Jabyq túrdegi bas-mı jaraqaty men kontýzııa alǵan. Іshki qurylysynda jaraqaty bary anyqtaldy. Dárigerler naýqasqa medıtsınalyq kómektiń barlyq túrin kórsetip, baqylaýǵa alyp otyr. Qazir naýqastyń jaǵdaıy turaqtalyp, em-dom alýdy jalǵastyryp jatyr», - dep habarlady oblystyq densaýlyq saqtaý basqarmasynyń baspasóz qyzmetinen.

Buǵan deıin Atyraýda eki jasóspirimdi qaqqan júrgizýshi kóligin tastap, qashyp ketkenin habarlaǵan edik.

Oblystyq polıtsııa departamenti baspasóz qyzmetiniń málimetinshe, 17 tamyzda saǵat 22:40 shamasynda «VAZ-2114» avtokóliginiń júrgizýshisi eki jasóspirimdi qaǵyp ketken.

«Atyraý qalasynda kólik júrgizýshisi eki jasóspirimdi qaǵyp ketti. Júrgizýshi Satpaev kóshesinde ornalasqan «Atyraý» oıyn-saýyq ortalyǵy tusynda rettelmegen jaıaý júrginshi ótkelinen ótip bara jatqan eki jasóspirimdi kóligimen qaǵyp qulatqan», - dep habarlady departamenttiń baspasóz qyzmetinen.

Olardy qaqqan júrgizýshi kóligin oqıǵa ornyna tastap, qashyp ketken. Qazir polıtsııa qyzmetkerleri júrgizýshini izdep jatyr. Al, kólik arnaıy turaqqa qoıyldy.