Atyraýda kóligine jalǵan nómir taqqan 24 júrgizýshi jazalandy
ATYRAÝ. QazAqparat – Atyraý oblysynda kóligine jalǵan memlekettik nómir taqqan 24 júrgizýshi jazalandy, dep habarlaıdy QazAqparat.
Oblystyń patrýldik polıtseıleri jol qozǵalysy erejelerin buzýshylyqty, sonyń ishinde memlekettik tirkeý belgileri jalǵan, qoldan jasalǵan kólikterdi anyqtaý is-sharasyn júrgizýde. Patrýldik polıtsııa batalonynyń komandıri Nurlan Sarsenbaevtyń málimetinshe, jyl basynan beri jalǵan nemese qoldan jasalǵan memlekettik tirkeý nómirimen, sondaı-aq, memlekettik tirkeý nómir belgileriniń túrin ózgertetin, jasyratyn qurylǵylar men materıaldarmen jabdyqtalǵan kólik quraldaryn basqarǵan 24 júrgizýshi anyqtalǵan. Olardyń bári jaýapkershilikke tartylǵan.
«Máselen, jaqynda Geolog shaǵyn aýdanynda Reseı Federatsııasynan ákelingen «Toyota Camry» avtokóligi toqtatyldy. Tekserý kezinde kóliktiń memlekettik nómiri jalǵan ekeni anyqtaldy. Kólikti basqarǵan 24 jastaǵy júrgizýshige qatysty QR Ákimshilik quqyqbuzýshylyq týraly Kodeksiniń 590-babynyń 4-bólimimen (Kórineý jalǵan nemese qoldan jasalǵan memlekettik tirkeý nómiri bergileri bar kólik quralyn basqarǵan) ákimshilik hattama toltyrylyp, jınaqtalǵan is-qujattar sotqa joldandy. Jaqynda sot sheshimimen bul azamat 1 jyl merzimge júrgizýshi quqyǵynan aıyryldy. Sondaı-aq, bul baptyń sanktsııasynda 20 aılyq eseptik kórsetkish kóleminde aıyppul salý da kózdelgen», - deıdi patrýldik polıtsııa batalonynyń komandıri Nurlan Sarsenbaev.
Eske sala ketelik, buǵan deıin Atyraýda kóligine eki túrli, sondaı-aq, jalǵan nómir taqqan júrgizýshiler ustalǵan edi.
