Atyraýda kóligin mas adamǵa aıdaýǵa bergen áıelge 428 myń teńge aıyppul salyndy
ATYRAÝ. QazAqparat – Atyraýda kóligin mas adamǵa bergen áıelge 428 myń teńge aıyppul salyndy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetine súıensek, jyl basynan beri mas kúıde kólik júrgizgen 60-tan astam júrgizýshi ákimshilik jaýapkershilikke tartylǵan.
«Máselen, patrýldik polıtsııa qyzmetkerleri 7 aqpanda saǵat 04:30 shamasynda Atyraý qalasyndaǵy Berǵalıev-Shoqaı kósheleriniń qıylysynda «VAZ – 2115» markaly avtokóligin toqtatty. Tekserý kezinde rýlde otyrǵan 1992 jylǵy jigittiń kólik júrgizý quqyǵy joq ekeni anyqtaldy. Medıtsınalyq saraptama qorytyndysymen onyń jeńil dárejeli mas kúıde ekeni belgili boldy. Oǵan qatysty QR Ákimshilik quqyq buzý kodeksiniń 608-babynyń 6-bólimimen ákimshilik hattama toltyryldy. Sot sheshimimen 20 táýlikke ákimshilik qamaýǵa alyndy», -dep habarlady departamenttiń baspasóz qyzmeti.
Sondaı-aq, bul kólikte 40 jastaǵy áıel bolǵan. Ol atalǵan kóliktiń ıesi bolyp shyqqan.
«Áıel ıesi bola tura kólik quralyn alkogoldi ishimdik ishken mas adamǵa basqarýǵa bergen. Osyǵan baılanysty oǵan qatysty QR Ákimshilik quqyq buzý kodeksiniń 608-babynyń 8-bóligimen ákimshilik hattama toltyryldy. Sot sheshimimen kólik ıesine 428 820 teńge kóleminde aıyppul salyndy. Al, avtokólik arnaýly turaqqa qoıyldy», -dep málim etti baspasóz qyzmetinen.
Eske sala ketelik, buǵan deıin Atyraýda mas turǵyn adam óltirgeni týraly jalǵan habar bergenin jazǵan edik.
