Atyraýda kóligimen 16 jasar balany qaǵyp, qashyp ketken áıel ustaldy
ATYRAÝ. QazAqparat – Atyraýda kóligimen 16 jasar jasóspirimdi qaǵyp, oqıǵa ornynan qashyp ketken áıel ustaldy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, jol-kólik oqıǵasy keshe, 29 qazan kúni saǵat 21:30 shamasynda bolǵan.
«Atyraý qalalyq polıtsııa basqarmasynyń 102 operatoryna «Órken» shaǵyn aýdanyndaǵy Satybaldıev kóshesinde BMW markaly kóligi jol jıeginde ketip bara jatqan jasóspirim balany qaqqany jóninde habar tústi. Alaıda, júrgizýshi oqıǵa ornynan qashyp ketken. Atalǵan jol-kólik oqıǵasyna baılanysty patrýldik polıtsııa men jedel basqarý ortalyǵynyń beınebaqylaý qyzmetkerleri izdestirý jumystaryn júrgizdi. Nátıjesinde 16 jasar jasóspirimdi qaǵyp, oqıǵa ornynan qashyp ketken 1988 jylǵy áıel ustaldy» -dep habarlady departamenttiń baspasóz qyzmeti.
Sheteldik kólik qaqqan 16 jasar jasóspirimniń oń aıaǵy synǵan. Qazir jasóspirim oblystyq balalar aýrýhanasynda jatyr.
Al, 33 jastaǵy júrgizýshi áıelge qatysty QR Qylmystyq Kodeksiniń 345-babymen qylmystyq is tirkelip, tergeý bastaldy.
Eske sala ketelik, buǵan deıin Atyraýda 71 jastaǵy zeınetkerdi kólik qaǵyp ketkenin j azǵan bolatynbyz.
