Atyraýda qoqys jáshiginiń janynan náreste tabyldy
ATYRAÝ. QazAqparat - Atyraý qalasynda qoqys jáshiginiń janynan jańa týǵan náreste tabyldy. Shaqalaq perınataldyq ortalyqqa jetkizildi, dep habarlaıdy «QazAqparat» HAA tilshisi.
«Búgin túnde Atyraý qalasy ІІB kezekshilik qyzmetine Nursaıa shaǵyn aýdanyndaǵy qoqys jáshiginiń janynan jańa týǵan náreste tabylǵany týraly habarlama kelip tústi. Shaqalaqty qoqys tastaýǵa shyqqan Shattyq Nuradınov tapqan. Ol dereý jedel járdem qyzmetine qońyraý shalady. Qazirgi ýaqytta bala Atyraý oblystyq perınataldyq ortalyǵynyń jańa týǵan nárestelerdiń patologııa bólimshesinde jatyr», - dep málimdedi Atyraý oblystyq prokýratýrasynyń baspasóz qyzmeti.
Oblys prokýrory Ernat Sybanqulov bergen qosymsha málimetterge súıensek, atalǵan derek QK 100-babynyń 24-bóligi boıynsha sotqa deıingi tergeýdiń biryńǵaı tizilimine tirkeldi. Sotqa deıingi tergeý amaldary bastalyp, is oblys prokýrorynyń baqylaýyna alyndy.
Atyraý oblystyq ІІD baspasóz qyzmetiniń habarlaýynsha, jańa týǵan qyz bala áıel adamnyń kıimine oralǵan. Balanyń salmaǵy 3 kg 56 gr. Atalǵan isti tergeýmen kámelettik jasqa tolmaǵandar isi jónindegi ınspektsııa men krımınaldy polıtsııa qyzmetkerleri aınalysyp jatyr.
Ázirge kókek ananyń tulǵasy anyqtalǵan joq.
Atyraý oblystyq densaýlyq saqtaý basqarmasy balanyń jaǵdaıy bir qalypty ekenin málimdedi. Qoqys janynan tbylǵan bala 6 qarasha kúni týǵan bolýy múmkin.
