Atyraýda qoqys polıgony órtenip jatyr
ATYRAÝ. QazAqparat – Atyraý qalasynyń irgesindegi qoqys polıgony órtenip jatyr, dep habarlaıdy QazAqparat.
Oblystyq Tótenshe jaǵdaılar departamentiniń habarlaýynsha, qatty qaldyqtar tógiletin alańdaǵy órtti sóndirýge «Arnaýly Avtobaza» JShS-niń qyzmetkerleri jumyldyrylǵan. Alaıda, órt sóndirýshilerge arnaıy habar túspegen.
«Departamenttiń anyqtaýshy-mamany qoqys alańyna baryp, anyqtaǵanyndaı, órtti aýyzdyqtaýǵa «Arnaýly Avtobaza» JShS-nen 20 qyzmetker tartylǵan. Olar kásiporynnyń 7 samosval, 4 júk tıegish, 4 sý shashatyn kóligimen órtti sóndirip jatyr», - dep habarlady departamenttiń baspasóz qyzmeti.
Buǵan deıin Atyraýda karantın merzimine qatysty jalǵan aqparat taraǵanyn , sondaı-aq, ıtti qorlyqpen óltirgen turǵyn qamaýǵa alynǵanyn habarlaǵan edik.
