Atyraýda kóktaıǵaqqa qarsy jumys kúsheıtildi
ATYRAÝ. QazAqparat - Atyraý qalasynda kóktaıǵaqqa qarsy 200 jumysshy, 20 tehnıka jumysqa kiristi, dep habarlaıdy QazAqparat tilshisi.
Atyraý qalasy ákimdiginiń baspasóz qyzmetiniń habarlaýynsha, qazirgi ýaqytta kólikke jáne jaıaý júrginshige arnalǵan joldyń bárine qum sebilip, ortalyq kóshelerge tuz eritindisi qoldanylyp jatyr. Ázirge 12 sýarý-jýý mashınasy, 6 traktor, 2 qum shashatyn kólik úzdiksiz jumys ústinde.
Sondaı-aq, buǵan deıin de jaýǵan jańbyrdyń saldarynan jolǵa muz qatyp, Atyraý-Astrahan joly jabylǵan edi.
Atyraýdaǵy «Qazgıdromet» ortalyǵynyń keshegi boljamy boıynsha, osy aýa raıy 6-7 jeltoqsan kúnderi de saqtalady. Sondyqtan úıden shyǵarda abaı bolǵan jón.
