Atyraýda qoǵamdyq orynda mas bop júrgen 3 myń adam ustaldy
ATYRAÝ. QazAqparat – Atyraý oblysynda jyl basynan beri 3000 adam qoǵamdyq orynda mas kúıinde ustalǵan, dep habarlaıdy QazAqparat.
Polıtsııa qyzmetkerleri alkogoldik ishimdikti asyra paıdalanatyn adamdardy anyqtaý jumysyn júrgizýde.
«Jyl basynan beri qoǵamdyq orynda mas kúıinde ustalǵan 3000-ǵa jýyq azamat ákimshilik jaýapkershilikke tartyldy. Onyń ishinde 242 adam osy quqyq buzýshylyqty qaıtalap jasaǵany anyqtaldy. Olarǵa QR Ákimshilik quqyq buzý kodeksiniń 440-baby boıynsha birinshi ret - 5 AEK aıyppul, al bir jyl ishinde qaıtalap jasalǵan buzýshylyq úshin - 10 AEK aıyppul nemese bes táýlikke qamaý kózdelgen» dep habarlady Atyraý qalalyq polıtsııa basqarmasy bastyǵynyń birinshi orynbasary Erlan Bıǵambaev.
Sonymen qatar, qoldanystaǵy zańnamaǵa sáıkes (QR ÁQBtK-niń 54-baby), mundaı «retsıdıvıster» úshin sot qaýlysymen 3 aıdan 6 aıǵa deıin minez-qulyqqa erekshe talap qoıylady.
Atap aıtqanda, esepke alynyp, ýchaskelik polıtsııa ınspektorlary mekenjaıyn tekserip, profılaktıkalyq jumys júrgiziledi.
Dál osyndaı erekshe talaptardy sot atalǵan 242 azamatqa qatysty belgilegen.
Eske sala ketelik, budan buryn Atyraýda tún tynyshtyǵyn buzǵan 1500 adam jaýapkershilikke tartylǵan bolatyn.
