Atyraýda qoǵamdyq kóliktiń júrýine ruqsat berilgen joq
ATYRAÝ. QazAqparat – Atyraý qalasynda karantın talaby jeńildetilgenmen, qoǵamdyq kólikterdiń júrýine ruqsat berilgen joq, dep habarlaıdy QazAqparat.
Oblystyq bas sanıtarlyq dáriger Temirbek Musaǵalıevtiń qaýlysymen 4 mamyrdan bastap 13 túrli nysannyń tańerteńgi saǵat 9:00-den keshki saǵat 17:00-ge deıin jumys isteýine ruqsat berilip otyr.
Onyń ishinde 500 sharshy metrge deıin aýmaǵy bar azyq-túlik emes dúkender, bólek ǵımaratta ornalasqan shashtarazdar, advokattyq qyzmet kórsetetin kompanııalar, medıtsınalyq ortalyqtar, stomatologııalyq klınıkalar, jarnama agenttikteri, aqparattyq-kommýnıkatsııalyq kompanııalar men tólem qyzmetin kórsetetin termınaldar bar.
Sondaı-aq, fotosalondar men gúl satatyn dúkender, mıkroqarjylyq mekemeler, saqtandyrý kompanııalary men lombardtar, aıyrbastaý pýnktteri, jyljymaıtyn múlikterge qatysty operatsııa júrgizetin kompanııalar da jumysyn bastady. Biraq, qoǵamdyq kólikterdiń júrýine ruqsat berilgen joq.
«Qoǵamdyq kólik – eń qaýipti oryn. Eger medıtsınalyq termınmen aıtar bolsaq, avtobýs salonynyń aldyńǵy bóliginde sımptomsyz aýyrǵan bir jolaýshy bolsa, ol jolaýshylardyń 65 protsentine aýrý juqtyrady. Al, ol salonnyń artqy bóliginde bolsa, onda jolaýshylardyń 20 protsentine indet taratady», - dedi osyǵan oraı Temirbek Musaǵalıev.
