Atyraýda qoǵamdyq kólik parki 20 jańa avtobýspen tolyqty
ATYRAÝ. QazAqparat - Atyraýda qoǵamdyq kólik parki 20 jańa avtobýspen tolyqty. Osyǵan oraı, № 4 jáne №8 baǵdarlar tolyǵymen jańartyldy, dep habarlaıdy QazAqparat Atyraý ákimdiginiń baspasóz qyzmetine silteme jasap.
Atyraýda qoǵamdyq kólikti jańartý tujyrymdamasyn júzege asyrý jalǵasýda. Jospar aıasynda avtopark taǵy 20 jańa avtobýspen tolyqty.
Qalalyq baǵyttaǵy avtobýstardyń jańartylýymen qatar, №4 baǵdardyń marshrýty ózgeredi. Bul ózgeris «Nursaıa» yqshamaýdanynan «Dına» bazaryna deıingi joldy edáýir qysqartady.
«Eger buryn avtobýs H.Dosmuhamedov atyndaǵy AMÝ jáne Atyraý munaı jáne gaz ýnıversıtetine aıaldaıtyn bolsa, qazir Mahambet kóshesiniń boıyndaǵy Ortalyq kópir arqyly tikeleı «Dına» bazaryna deıin júredi. №8 jańartylǵan marshrýt baǵyty ózgermeıdi - Shırına aýyldyq okrýginen bastap Bereke shaǵyn aýdanyna deıin (Konteıner)», - deıdi «Smart Atyraý» qazynalyq memlekettik mekemesiniń dırektory Ádilbek Tankıev.
Aıta keteıik, Atyraý qalasynda qoǵamdyq kólik tapshylyǵyn joıý maqsatynda oblys ákiminiń tapsyrmasy boıynsha «Atyraý «ÁKK» AQ-nyń qatysýymen «Atyraý-Avtoparki» jańa avtobýs parki quryldy. Semeıde qurastyrylǵan 65 jańa avtobýs satyp alyndy. Osynyń arqasynda №14, 12, 2, 4 jáne 8 avtobýstar jańartyldy.
Sonymen qatar, qoǵamdyq kólikti jańartý tujyrymdamasyn iske asyrý aıasynda 2019 jyly qosymsha 200 jańa avtobýs satyp alý josparlanyp otyr.
Aıta keteıik, olardy satyp alýǵa jergilikti bıýdjetten qarajat bólingen joq. Qoǵamdyq kólik avtobýs parkin jańartýdyń jańa baǵdarlamasy boıynsha satyp alyndy. Onyń operatory - «BRK-Lızıng» AQ.
