Atyraýda kishkentaı balaqaıdyń denesi balabaqshadan kógerip kelgen
Atyraý qalasynyń turǵyny Gúldeı Bısekenqyzynyń balasynyń balabaqshaǵa barǵanyna eki apta bolǵan. Al, 4 tamyzda balabaqshadan arqasy kógerip kelgen.
«Úıge kelip, kıimin sheshkende arqasyn kórip, júregim ushty. Birden balabaqshaǵa baramyn dep tárbıeshisine, dırektoryna jazdym. Dırektor balabaqshaǵa ornalasar kezde kamera baryn aıtqan edi. Eger bir nárse bolǵan jaǵdaıda kamerany qaraı alasyzdar degeni bar. Dırektor, tárbıeshi, kútýshi, massajıst apaı bar, bárimiz sóılestik. Endi kamera óship qalǵanyn aıtyp otyr. Dırektor tárbıeshini jaqtap, kútýshige yǵystyryp otyr. Basty jaýapkershilik tárbıeshide emes pe? Kamera óshir qalǵanyna kim jaýapty? Barlyq fılıalynda kameranyń jumys jasap turǵanyn kúndelikti tekserip otyratyn jaýapty qyzmetker bolýy kerek emes pe? Jumystaryna salǵyrt qaraý ǵoı bul», -dep jazdy áleýmettik jelide Gúldeı Bısekenqyzy.
Oblys ákiminiń orynbasary Jasulan Bısembıev atalǵan jaıttyń baqylaýǵa alynǵanyn habarlady.
«Atyraýdaǵy «Zeınep Ámına» balabaqshasyndaǵy jaǵdaıǵa baılanysty máseleniń tıisti oryndar baqylaýynda ekendigin aıtqym keledi. Qazirgi ýaqytta jaǵdaıdy jan-jaqty zerdeleý boıynsha Atyraý oblystyq bilim berý basqarmasy, Atyraý qalalyq bilim bólimine tapsyrmalar berdim. Bala quqyǵy jáne qaýipsizdigi basty nazarda bolýy kerek. Sondyqtan, balamen jumys jasaıtyn kez kelgen ortalyq eń aldymen jaýapkershilikti sezinýi tıis», -dep habarlady Jasulan Bısembıev.
Eske sala ketelik, budan buryn Atyraýdaǵy «Shańyraq» balalar aýylynyń eki tárbıeshisi tárbıelenýshilerdi urǵanyn habarlaǵan bolatynbyz.
