Atyraýda kilem jýatyn tseh órtendi
ATYRAÝ. QazAqparat – Atyraý qalasynda kilem jýatyn tsehtyń ǵımaraty órtendi, dep habarlaıdy QazAqparat.
Oblystyq Tótenshe jaǵdaılar departamentiniń baspasóz qyzmetinen málim etkendeı, búgin, 1 aqpanda saǵat 07:18-de Atyraý qalasyyń Jalańtós batyr kóshesinde ornalasqan kilem jýatyn tsehtyń ǵımaraty órtengen.
«Oqıǵa ornyna dereý jetken órt sóndirýshiler «Evrazııa» kilem jýý tsehy ǵımaratynyń shatyry órtengenin anyqtady. Órt sharpyǵan aýmaqtyń kólemi 104 sharshy metrdi qurady. Jedel áreket etken órt sóndirýshiler jalynnyń 221 sharshy metrge taralýyna jol bermeı, 30 kilem men 3 kilem jýǵysh apparatty qaýipsiz jerge shyǵardy» dep habarlady departamenttiń baspasóz qyzmeti.
Órtti sóndirýge jeke quramnyń 24 qyzmetkeri men 5 arnaıy tehnıka jumyldyryldy. Jalyn saǵat 08:13-te oqshaýlanyp, saǵat 08:35-te tolyq sóndirildi.
Qazir órttiń shyǵý sebebi anyqtalyp jatyr.
Eske sala ketelik, budan buryn Atyraýda turǵyn úıde gaz jarylyp, 3 adam aýrýhanaǵa túskenin habarlaǵan bolatynbyz.
