Atyraýda keı turǵyndar «koronavırýs joq» degen jalǵan aqparatqa senedi
ATYRAÝ. QazAqparat – Atyraý oblysynyń ákimi Mahambet Dosmuhambetov Covid-19 indetine baılanysty aımaqtaǵy epıdemıologııalyq ahýal jóninde keńes ótkizip, ınfektsııanyń qaýpin túsindirý jumystaryn toqtatpaýdy tapsyrdy, dep habarlaıdy QazAqparat.
Qazir oblysta qaýipti indetti juqtyrǵandar sany 1272 adamǵa jetti. Onyń 1022-si - Teńiz ken ornynda, al 200-i - qala men aýdandarda tirkelgen.
Atyraý oblysynyń bas memlekettik sanıtar dárigeri Amantaı Jumaǵalıevtyń málimetinshe, karantın engizilgen aýdan jáne aýyl turǵyndary barynsha saq bolýy kerek. Óıtkeni, kóp adam áleýmettik jelide taraǵan «koronavırýs joq» degen jalǵan aqparatqa senedi. Bul azdaı maska rejımi men araqashyqtyqty saqtamaıdy. Sondyqtan, toı-tomalaq, qonaqqa barý, sondaı-aq ózge de adam kóp jınalatyn sharalardan bas tartqan jón.
«Ár adam birinshi kezekte óziniń saqtyǵyn oılaýy kerek. Odan soń týysqandary men jaqyndarynyń densaýlyǵy úshin de abaı bolýy tıis. Aınaladaǵy adamdarmen múmkindiginshe araqashyqtyqty saqtaý qajet»,- dedi Amantaı Jumaǵalıev.
Al, oblys ákiminiń orynbasary Baqytgúl Hamenovanyń aıtýynsha, koronavırýs indeti bastalmaı turyp-aq aımaqta aýqymdy daıyndyq jumystary men aldyn alý sharalary júrgizilgen. Sonyń nátıjesinde qaýipti derttiń jappaı taralýyna jol berilmedi.
«Óńirde Covid-2019 ınfektsııasy tirkelgen kezde 130 kereýettik ınfektsııalyq statsıonar bolsa, qazir 595-ke, bastapqyda 1900 orynǵa eseptelgen karantındik statsıonardaǵy oryn 2328-ge jetti. Al, 200 kerýettik provızorlyq statsıonardy 263-ke deıin kóbeıttik. Búgingi kúni ınfektsııalyq statsıonardan - 773 naýqas, provızorlyq ortalyqtan - 429, sondaı-aq, karantındik statsıonardan - 2255 naýqas emdelip shyqty»,- dedi oblys ákiminiń orynbasary Baqytgúl Hamenova.
Oblys ákimi Mahambet Dosmuhambetov aýdan ákimderine saqtyq sharalaryn kúsheıtýdi tapsyrdy. Ásirese, ınfektsııanyń taralýyna jol berilmeýi qajet. Eń bastysy, halyqqa koronavırýstyń qaýpi týraly túsindirý jumystaryn toqtatpaýdy júktedi.
Buǵan deıin Atyraýda saıabaqtar men alańǵa barýǵa tyıym salynyp, Aqkól aýyly karantınge jabylǵanyn habarlaǵan edik.
