Atyraýda keı kompanııalar jumysshylarǵa jalaqysyn bermeı kelgen

ATYRAÝ. QazAqparat – Atyraý oblysynda kompanııalar jumysshylarǵa eńbekaqy men zeınetaqy tólemin aýdarmaı kelgen, dep habarlaıdy QazAqparat tilshisi.

Atyraý oblystyq prokýratýrasy baspasóz qyzmetiniń málimetine súıensek, Jylyoı aýdanynda jumysshylardyń quqyǵy buzylǵan.

«Jylyoı aýdanynyń prokýratýrasy jumysshylardyń eńbek quqyǵyn buzý deregin anyqtady. «Batys Teh Invest» JShS-niń jumysshylaryna eńbekaqyny tólemeý, sondaı-aq «JylyoıSý» MKK men Teńiz ken ornynda «InterTasko» JShS-niń jumysshylaryna zeınetaqy jáne áleýmettik aýdarymdary jasalmaı kelgen. Prokýrorlyq qadaǵalaý aktileri negizinde 180 jumysshyǵa 32 mln teńge kóleminde eńbekaqy bereshegi óteldi. Al, 744 jumysshyǵa 48 mln teńge kóleminde zeınetaqy jáne áleýmettik aýdarymdary óndirildi», -dep habarlady prokýratýranyń baspasóz qyzmeti.

Eske sala ketelik, buǵan deıin Atyraý oblysynda 180 jumysshyǵa 32 mln teńgeniń jalaqy bereshegi ótelgenin habarlaǵan bolatynbyz.

Atyraý oblysynyń prokýrory Baýyrjan Jumaqanovtyń málimetinshe, bıylǵy 6 aıda 58 myńnan astam azamattyń, onyń ishinde 18 myń balanyń, 4,2 myń kásipkerdiń quqyǵy qorǵalǵan.