Atyraýda «QazTransOıl» AQ fılıalyna munaı tógilýine jol bergeni úshin 1,6 mln. teńge aıyppul salyndy

«Qańtar aıynda polıtsııa qyzmetkerleri Martyshı-Atyraý qubyrynda munaıdyń tógilgenin áshkereledi. Muqııat qaraý kezinde bul jerde munaı urlanǵan zańsyz tesik bolǵany anyqtaldy. Munaı ol arqyly aǵyzylyp, saldarynan jerde uzyndyǵy shamamen 30 metr, eni 15 metr daq paıda boldy.

Qylmystyq is qozǵaldy. Tabıǵatty qorǵaý prokýratýrasynyń usynymymen Atyraý oblysynyń ekologııa departamenti keltirgen shyǵyndy óteý týraly qaýly shyǵardy. Munaı kompanııasyna ekologııalyq jáne sanıtarlyq-epıdemıologııalyq talaptardy buzǵany úshin 1 mln. 189 myń 200 teńge jáne jerdi lastaǵany úshin 396 myń 400 teńge kóleminde aıyppul salyndy. Qubyrǵa baqylaý jasaýy tıis bolǵan qyzmettik tulǵalarǵa da aıyppul salyndy», - dep habarlady QazAqparat tilshisine Atyraý oblystyq mamandandyrylǵan tabıǵatty qorǵaý prokýrory Qaırat Óteýlıev.

«Munaıdy urlaýǵa qatysty tulǵalar ázirge anyqtalǵan joq. Biraq tergeý toby olardy anyqtaýǵa baǵyttalǵan jedel sharalardy jalǵastyrýda», - dep aqparattandyrdy oblystyq ІІD baspasóz qyzmetiniń basshysy Gúlnázıra Muhtarova.