Atyraýda Qazaqstannyń Eńbek Eri Ilıa Jaqanovtyń shyǵarmashylyq keshi ótti
ATYRAÝ. QazAqparat – Atyraýda Qazaqstanyń Eńbek Eri Ilıa Jaqanovtyń shyǵarmashylyq keshi ótti, dep habarlaıdy QazAqparat.
Qazaq ánderiniń shyǵý tarıhy men halyq kompozıtorlarynyń shyǵarmashylyǵyn tereń zerttegen Qazaqstan men Qyrǵyzstannyń eńbek sińirgen qaıratkeri, jazýshy, óner zertteýshisi, kompozıtor, Qazaqstannyń Eńbek Eri Ilıa Jaqanovtyń shyǵarmashylyǵyna arnalǵan kesh «Ánim saǵan, týǵan el» dep atalǵan. Shyǵarmashylyq keshke Ilıa Jaqanov pen jubaıy Tıysh Altaıqyzy, oblys ákimi Serik Shápkenov, zııaly qaýym ókilderi men mádenıet qyzmetkerleri qatysty.
Oblys ákimi kórermenin 60 jyldan astam ýaqyt ásem sazǵa bólegen Ilıa Jaqanovty quttyqtap, jyly lebizin bildirdi.
«Ilıa aǵa – ótken ǵasyrlar saryny men búgingi kásibı mýzykany ushtastyrǵan ǵajaıyp óner ıesi. «Edil men Jaıyq» – búgin de beıresmı Gımnimiz. Aǵamyz segiz qyrly bir syrly, barlyq óner túri bir ózinen tabylǵan. Siz – búkil qazaq óneriniń onyń ishinde án óneriniń tarıhyn zerttep, keıingi urpaqqa mura etip qaldyrýdy maqsat etken jáne onyń damýyna zor úles qosyp júrgen biregeı talant ıesisiz. Elimizdiń keleshegi úshin sizdiń qyl qalamyńyzdan týǵan, júregińizdin shyqqan dúnıelerdiń bereri mol. El Prezıdentinen qolynan alǵan Qazaqstannyń Eńbek Eri erekshe ataǵyńyz bar qazaqtyń ónerine berilgen joǵary baǵa bilemiz. Ózińiz ánge qosqan Jaıyq jaǵasyndaǵy Atyraýdyń ǵana emes, bar qazaqtyń danagóı aqylmany, án men jyrdyń telegeı-teńiz darııasy bolyp aman otyryńyz. Denińizge saýlyq, otbasyńyzǵa amandyq tileımiz», -dedi Serik Shápkenov.
Shyǵarmashylyq keshte Nur-Sultan, Almaty men Oral qalasynan arnaıy kelgen ánshiler, Atyraý oblysynyń tanymal óner ıeleri, mádenıet salasynyń qaıratkerleri men úzdikteri I.Jaqanovtyń ánderin oryndady.
«Ánmen ótip kele jatqan ómirimniń búgingi saltanaty esten ketpeıtindeı oqıǵa boldy. Jan júrekpen uǵynysqan, sahna tórinde barlyǵy úılesken, saǵynysyp kórisken ádemi kesh ótti. Án jazsam da, sýret salsam da, kitap jazsam da ótken sát, búgingi sát pen keleshekti elestetip otyramyn. Ǵasyrlarǵa ketetindeı dúnıe bolsyn dep barymmen jazamyn. Batys óńirine 25-30 ánimdi arnap jazyppyn», -dedi Ilıa Jaqanov.
Eske sala ketelik, bıyl Prezıdent Qasym-Jomart Toqaev jazýshy, kompozıtor Ilıa Jaqanovqa joǵarǵy dárejeli erekshelik belgisi – «Qazaqstannyń Eńbek Eri» ataǵyn tapsyrǵan edi.
