Atyraýda qazaqstandyq joǵary oqý oryndary rektorlarynyń keńesi ótti
ATYRAÝ. QazAqparat - Atyraýda qazaqstandyq joǵary oqý oryndary rektorlarynyń keńesi ótti, dep habarlaıdy QazAqparat oblys ákiminiń baspasóz qyzmetine silteme jasaı otyryp.
Rektorlardyń aldynda sóz sóılegen Atyraý oblysynyń ákimi Nurlan Noǵaev strategııalyq jáne memleketik baǵdarlamalardy júzege asyrýdaǵy joǵary oqý oryndarynyń mańyzdy rólin atap ótti.
«Memleket basshysy bizdiń qoǵamymyzdyń eń belsendi toby - jastarǵa bilim berý isine erekshe mańyz beredi. Memlekettiń odan ári damýy úshin jastardyń tek bilim alyp qana qoımaı, kózqarastarynyń da keń bolýy mańyzdy. Osy rette ýnıversıtetterdiń atqaratyn róliniń zor ekendigin aıta ketý kerek. Bıylǵy jyly oblysta jergilikti bıýdjet esebinen bilim granttaryn 222 abıtýrıent aldy. Olardyń 178-i pedagogıkalyq, 35-i medıtsınalyq, 9-y veterınarııa salasy boıynsha bilim alady»,-dedi N.Noǵaev.
Májilis barysynda bilim salasy boıynsha jańa býynnyń jobalary, «Ekonomıkanyń jańa úlgisi aıasynda maman kadrlardy daıyndaý», «Ortalyq Azııada bilim berý habin damytý men ǵylymdy jańǵyrtý» sııaqty jobalardy júzege asyrý máseleleri talqylandy.
QR Joǵary oqý oryndary rektorlary keńesiniń 2018 jylǵa arnalǵan jumys jospary bektildi. Májilis barysynda H.Dosmuhamedov atyndaǵy Atyraý ýnıversıtetiniń rektory Abzal Taltenov oqý ornynda júzege asyrylyp jatqan jobalar týraly aıtty. Olardyń arasynda aǵylshyn tilin oqytýǵa arnalǵan «English Only Space» alańy, bıznes-ınkýbator jáne «i-Space» kovorkıng ortalyǵy, balalarǵa arnalǵan «Kids University» bilim berý alańy, ýnıversıtet mańyn jaryqtandyrý úshin kún jylýynan energııa alatyn júıe bar.
