Atyraýda qaıyrymdylyq ortalyǵy azyq-túlik pen medıtsınalyq maskany tegin taratty
«Biz qaıyrymdylyq ortalyǵyn «Yqylasty baýyrlar» dep atadyq. Óıtkeni, muqtaj adamdarǵa qaıyrymdylyqty árkim óz yqylasymen jasaýy tıis. Bizdiń de maqsatymyz – qazirgideı ýaqytsha qıyndyq týyndaǵan shaqta baýyrlarymyzǵa kómek qolyn sozý», - deıdi Qazaqstan Musylmandary Dinı basqarmasynyń Atyraý oblysyndaǵy ókili, «Imanǵalı» meshitiniń bas ımamy Altynbek Utyshanuly.
Onyń aıtýynsha, ortalyqtyń jumysy eki baǵytty qamtıdy. Birinshiden, kópbalaly, áleýmettik turmysy tómen otbasylarǵa, jetim, múmkindigi shekteýli jandarǵa azyq-túlik paketin taratý. Ekinshiden, azamattardyń ortalyqqa tapsyrǵan kıimderin hımııalyq tazalaýdan ótkizip, muqtaj otbasylarǵa berý.
Ortalyqty uıymdastyrýshylar alǵashqy kúni 20 otbasyǵa azyq-túlik paketin taratty. Sondaı-aq, meshit janynan tigilgen 200 medıtsınalyq maska turǵyndarǵa tegin úlestirildi.
