Atyraýda qaıyrymdylyq dúkeni kópbalaly analarǵa kómek kórsetýde

ATYRAÝ. QazAqparat - Atyraýda «Igi iske bastama» qoǵamdyq birlestigi qaıyrymdylyq dúkenin ashyp, osy ýaqytqa deıin 300-den astam otbasyǵa kómek kórsetti, dep habarlaıdy QazAqparat tilshisi.

Qaıyrymdylyq dúkeni mamyr aıynan bastap jumys júrgizip keledi. Maqsaty – kópbalaly analar men áleýmettik osal toptaǵy azamattardy kıim-keshek jáne azyq-túlikpen qamtamasyz etý. Dúkendegi taýarlar jomart jandar ákelgen syrt kıimder men aıaq kıimderden turady.

«Igi ske bastama» qoǵamdyq birlestiginiń jetekshisi – Aqylbek Muhanovtyń aıtýynsha, dúkendegi barlyq dúnıe muqtaj jandar úshin aqysyz beriledi. «Dúkennen aqysyz túrde tamaq alý úshin kópbalaly, jalǵyzbasty analardyń qujattary suralady. Al, kıim alý úshin eshqandaı shekteý joq. Eń bastysy –muqtaj jandardyń jeke kýáligi qajet», - deıdi Aqylbek Muhanov. «Igi iske bastama» qoǵamdyq birlestigi de qataryna erikti jandardy jınaýda. Basty talap – muqtaj jandarǵa kómektesýge yntaly bolýy.