Atyraýda qaıyrshylyqty kásip etken 814 adam jazalandy
ATYRAÝ. QazAqparat – Byltyr Atyraýda qaıyrshylyqty kásip etken 814 adam jazalandy, dep habarlaıdy QazAqparat.
Oblystyq polıtsııa departamenti baspasóz qyzmetiniń aqparatyna qaraǵanda, Atyraý qalasyndaǵy qoǵamdyq oryndarda azamattarǵa tıisetin, bal ashyp, qaıyrshylyqty kásip etkender azaımaı tur.
«Byltyr osyndaı quqyq buzýshylyqty jasaǵan 814 adam anyqtalǵan edi. Olardyń bári ákimshilik jaýapkershilikke tartyldy. Al, jyl basynan beri ýchaskelik polıtsııa ınspektorlary reıdtik is-shara kezinde qaıyrshylyqpen aınalysyp júrgen 6 azamatty anyqtady. Máselen, Atyraý qalasyndaǵy №9 orta mekteptiń tusynda 52 jastaǵy turǵynnyń qaıyrshylyqpen kásip etkeni belgili boldy. Oǵan qatysty QR Ákimshilik quqyq buzý kodeksiniń 449-babymen ákimshilik hattama toltyrylyp, eskertý berildi» dep habarlady departamenttiń baspasóz qyzmeti.
Sondaı-aq, polıtsııa qyzmetkerleriniń eskertýine qaramastan atalǵan quqyq buzýshylyqty qaıtalap jasaǵan 2 azamat anyqtalǵan.
Olarǵa qatysty ákimshilik hattama jasalyp, árqaısysyna 10 aılyq eseptik kórsetkish kóleminde aıyppul salynǵan.
Eske sala ketelik, budan buryn Atyraýda qala turǵynynyń 2 mln teńgesin aldap alǵan alaıaq ustalǵan bolatyn.
