Atyraýda qatty jel turǵyn úılerdiń shatyryn ushyryp áketti

ATYRAÝ. QazAqparat –Atyraýda qatty jelden turǵyn úılerdiń shatyry ushty, dep habarlaıdy QazAqparat.

Keshe, 13 qańtarda «Qazgıdromet» RMK Atyraý oblysynyń keı jerinde azdaǵan qar jaýyp, jeldiń uıytqýy 25 m/s-qa deıin jetetinin eskertken edi. Osyǵan oraı Atyraý qalasy men aýdandar ákimdigine daýyldy eskertýge baılanysty qajetti sharalardy qabyldaý týraly aqparat, uıaly baılanys operatorlary arqyly halyqty sms-habarlandyrý jiberilgen.

«Búgin, 14 qańtarda Atyraý qalasynda jeldiń uıytqýy 18-19 m/s-qa jetip, turǵyn úılerdiń shatyryn ushyryp áketti. Tańǵy saǵat 07:10-da Call-ortalyqqa «Nursaıa» shaǵyn aýdanynda shatyrdyń qulaý qaýpi týraly habarlama tústi. Qutqarýshylar №84-shi úıdiń 72 sharshy metr shatyry qaıyrylyp, qalǵan bóliginiń qulaǵanyn anyqtady. Al, saǵat 08:22-de Azattyq dańǵylyndaǵy №77 úı shatyrynyń qulaý qaýpi tóndi», -dep habarlady Tótenshe jaǵdaılar departamentiniń baspasóz qyzmetinen.

Jedel-qutqarý jasaǵynyń qutqarýshylary avarııalyq-qutqarý jumystaryn júrgizip,

búlingen shatyrlardyń konstrýktsııalaryn nyǵaıtqan. Kólik jolyna túsken shatyrlardy

jınaqtap, turǵyndardyń ómirine tóngen qaýipti dereý joıǵan.