Atyraýda qatty turmystyq qaldyqtardy óńdeıtin keshender salynyp jatyr
Oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Nurlan Jantoqovtyń málimetinshe, bıyl qatty turmystyq qaldyqtardy suryptaý jáne qaıta óńdeý kórsetkishin 33%-ǵa jetkizý josparlanyp otyr.
Bıyl Atyraý qalasynda jeke ınvestorlardyń qarjysymen qatty turmystyq qaldyqtardy suryptaıtyn jáne óńdeıtin keshenderdiń qurylysy bastalǵan. Jańa keshenderdiń qýaty – jylyna 225 myń tonna.
Máselen, «PromEkologııa» JShS-ǵa suryptaý-óńdeý kesheniniń qurylysy úshin qalanyń sol jaq bóliginen 30 gektar jer telimi berilgen. Shahardyń oń jaq bóliginen qoqysty qaıta óńdeý zaýytyn salý úshin «GrınSıtıKlınıng» JShS-ǵa 5 gektar jer ýchaskesi bólingen. Eki keshenniń quny 2,5 mlrd teńgeni quraıdy.
«Bıyl «GrınSıtıKlınıng» JShS-niń qarjysyna salynyp jatqan keshen iske qosylady. Al, «Promekologııa» JShS qurylys jumystaryn 2023 jyly aıaqtaýdy kózdep otyr. Jańa keshender nysany paıdalanýǵa berilgennen keıin eski qatty turmystyq qaldyqtar polıgonyn qalpyna keltirý jumystary bastalady. Bul jumystar tolyqtaı iske asyrylǵannan keıin, naqtylaı aıtqanda, 2025 jylǵa qaraı aýaǵa taralatyn jaǵymsyz ıister, sondaı-aq, jerasty sýlarynyń zııandy zattarmen lastanýy azaıady. Sondaı-aq, qatty turmystyq qaldyqtardy suryptap, qaıta óńdeý kórsetkishin 33%-ǵa jetkizý josparlanyp otyr», -dep málim etti Nurlan Jantoqov.
Eske sala ketelik, budan buryn Atyraýda zańsyz alańǵa tógilgen 2 300 tonna qoqys jınalǵanyn jazǵan bolatynbyz.
