Atyraýda qatigezdikpen adam óltirgen azamat májbúrli emdetýge jiberildi
ATYRAÝ. QazAqparat - Atyraýda vokzal mańyndaǵy dámhanada asa qatygezdikpen adam óltirdi dep aıyptalǵan Qyrǵyzstan Respýblıkasynyń T. esimdi azamaty májbúrli emdetýge jiberildi, dep habarlaıdy QazAqparat tilshisi Atyraý oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmetine silteme jasap.
2017 jyldyń qarashasynda vokzal mańyndaǵy «Arba» dámhanasynda tamaqtanyp otyrǵan 39 jastaǵy Aqtaý qalasynyń turǵyny I.G.-ny esh sebepsiz 1991 jyly týǵan sottalýshy pyshaqtaǵan. Іs materıaldarynda anyqtalǵandaı, jalpy alǵanda ol pyshaqpen denesiniń ártúrli bóligine 52 soqqy jasaǵan. Alynǵan jaraqat saldarynan jábirlenýshi sol jerde kóz jumǵan.
«Tergeý barysynda T.-nyń qylmysy áreketke qabiletsizdigi saldarynan jasalǵany, óıtkeni ol «Dıfferentsııalanbaǵan shızofrenııa» psıhıkalyq dertine shaldyqqany anyqtaldy. Sondyqtan sot QK-tiń 16 babyna sáıkes qoǵamdyq qaýipti is-áreketti aqyl-esi durys emes jaǵdaıda jasaǵandyqtan sottalýshy T.-ny qylmystyq jaýapkershilikten bosatty», delingen sottyń taratqan habarlamasynda.
Sondaı-aq, sot aıyptalýshy T.-ǵa qatysty Almaty oblysy Talǵar aýdany Aqtas kentinde ornalasqan «Jiti baqylanatyn mamandandyrylǵan úlgidegi respýblıkalyq psıhıatrııalyq aýrýhanasynda» medıtsınalyq sıpattaǵy májbúrleý sharasyn qoldaný týraly qaýly shyǵardy.
