Atyraýda qaterli isiktiń bar-joǵyn jasandy ıntellekt anyqtaıdy
«Qazaq onkologııa jáne radıologııa ǵylymı-zertteý ınstıtýtynyń» dırektory, medıtsına ǵylymdarynyń doktory, professor, UǴA akademıgi Dılıara Qaıdarovanyń aıtýynsha, sońǵy tórt jylda onkologııalyq aýrýdyń tirkelý dınamıkasynda báseńdeý bar.
Ol bul pikirin oblys ákiminiń orynbasary Baqytgúl Hamenovanyń qatysýymen ótken úılestirý keńesiniń otyrysynda aıtty.
«Sońǵy jyldary óńirdegi onkologııa dıspanseri 26 mamanmen tolyqty. Buryn naýqastar em alý úshin Almatyǵa baryp qaralatyn edi. Qazirgi onkologııalyq aýrýǵa shaldyqqandarǵa joǵary sapaly kómek jergilikti medıtsınalyq mekemede kórsetilip otyr. Atyraýdyń medıtsına mekemeleri sońǵy úlgidegi qurylǵylarmen jabdyqtalǵan. Munda kúrdeli ota jasaýǵa da múmkindik bar», - deıdi Dılıara Qaıdarova.
Oblystyq densaýlyq saqtaý basqarmasynyń basshysy Ashan Baıdýalıevtiń málimetinshe, Atyraýda sút bezi, ókpe obyry, asqazannyń qaterli isigi aýrýlary jıi kezdesedi.
«Sol sebepten medıtsınalyq mekemeler erte merzimde dıagnostıkadan ótkizip, zertteýge múmkindik beretin, kúrdeli ota jasaýǵa qajet qurylǵylarmen jabdyqtaldy. Biraq, oblystaǵy onkologııalyq dıspanserdiń ǵımaratynyń eskirgeni ras. Osyǵan baılanysty aımaq basshysyna usynys daıyndalýda», - dedi basqarma basshysy Ashan Baıdýalıev.
Jaqynda óńirdegi medıtsınalyq mekemeler ortaq júıege qosyldy. Bul júıe qala-aýdandardaǵy tomografııa, rentgen zertteýiniń qorytyndylaryn ortaq bazada jınaqtap, zerdeleýge múmkindik beredi.
Al, qaterli isiktiń belgilerin jasandy ıntellekt kómegimen anyqtaýǵa múmkindik jasalyp otyr.
«Jasandy ıntellekt qaterli isikterdi meıilinshe erte merzimde anyqtaýǵa múmkindik beredi. Biz obyrǵa shaldyqqan naýqastyń ómir súrý uzaqtyǵyn keminde 5-6 jylǵa soza alsaq, munyń ózi - úlken jetistik», - dedi Ashan Baıdýalıev.
Akademık Dılıara Qaıdarovanyń aıtýynsha, onkologııalyq aýrýlardy anyqtaýdyń eń tıimdi joly – medıtsınalyq skrınıng.
Qaterli isik erte anyqtalǵan jaǵdaıda mamandar naýqasqa 70-80 paıyzǵa deıin kómek kórsete alady.
Onyń málimetinshe, Qazaqstanda qaterli syrqatqa qarsy skrınıngtik tekserýler 25 jastan bastalady.
Áıelder arasynda jatyr moıyny obyryna qarsy tekserý 30-35 jastan, sút bezi obyryna qarsy tekserý 50-60, erler arasynda qýyq bezi obyryna qarsy medıtsınalyq skrınıng 50-54, 58-62 jas aralyǵynda ótkiziledi.
Asqazan, óńesh obyryna qarsy tekserý er, áıel adamdar úshin 50 jastan bastalady. Al, baýyr obyryna qarsy tekserýden patsıent kez kelgen jasta óte alady.
Qazir Atyraý oblysynda onkologııalyq esepte 4500 naýqas tur. Sońǵy bir jylda qaterli isik 1150 adamnan anyqtalǵan.
