Atyraýda Kaspıı jaǵasynan brakonerlerdiń «qonysy» tabyldy
ATYRAÝ. QazAqparat – Atyraý oblysynda Kaspıı jaǵasynan brakonerlerdiń ýaqytsha «qonysy» tabyldy, dep habarlaıdy QazAqparat.
Bul Jaıyq-Kaspıı oblysaralyq basseındik balyq sharýashylyǵy ınspektsııasy men Atyraý mamandandyrylǵan tabıǵat qorǵaý prokýratýrasy qyzmetkerleriniń birlesken reıdi kezinde anyqtalǵan.
«Bekire-2021» balyq qorǵaý aktsııasy aıasynda Kaspıı teńiziniń soltústik jaǵalaýyn qamtyǵan birlesken reıdke tikushaq tartyldy.
«Reıd kezinde Jylyoı aýdanyndaǵy «Tereń-Ózek» ken ornyna jaqyn jerde, qamys qopasynyń arasynan ýaqytsha «qonys» tabylǵan. Onda birneshe adamǵa arnalǵan tósek-oryn jabdyǵy, gaz ballony, azyq-túlikter pen sý qory, qural-saımandar jıyntyǵy, avtomobıl akkýmýlıatory, fonarlar, qýattaǵysh qurylǵylar, ratsııa men bir uńǵyly myltyq bolǵan. Ýaqytsha «qonystyń» janynda jol talǵamaı júrýge laıyqtalǵan 2 kólik turǵan. Sý jaǵasynda 3 rezeńke qaıyq baılanǵan. Sondaı-aq, 7 qapqa qytaılyq aý salynǵan» -dep habarlady Balyq sharýashylyǵy komıtetiniń baspasóz qyzmeti.
Kaspıı jaǵasynan tabylǵan kóliktiń biri, sondaı-aq rezeńke qaıyqtar men balyq aýlaý quraldary salynǵan sómkeler Atyraý qalasyna jetkizildi. Atalǵan derekke qatysty toltyrylǵan hattamalar quqyq qorǵaý organdaryna joldanady.
Eske sala ketelik, buǵan deıin Atyraý oblysynda qamys arasyna jasyrylǵan úsh júrdek qaıyq tárkilengenin habarlaǵan bolatynbyz.
