Atyraýda kásipkerlerge zańsyz tekserýler júrgizilgen
Oblystyq prokýratýra Memleket basshysynyń shaǵyn jáne mıkrokásipkerlik sýbektilerin tekserýge moratorıı jarııalaýyna baılanysty zańsyzdyqqa jol bermeý úshin mobıldik top qurǵan edi. Jyl basynan beri atalǵan bul top 300-den astam kásipkerdiń quqyǵyn qorǵady.
«Máselen, jarııalanǵan moratorııge qaramastan qalalyq veterınarııa bólimi zańǵa sáıkes negizi bolmasa da qalanyń iri bazarlarynda shaǵyn bıznes sýbektilerine tekserýler júrgizgen. «Bas jospar» JShS bıznes sýbektilerine zań buzýshylyqtardy joıý týraly habarlama bere otyryp, tekserý júrgizgen. Atalǵan faktiler boıynsha prokýrorlyq yqpal etý aktisi engizilip, 6 laýazymdy tulǵa jaýapkershilikke tartyldy», dep habarlady oblystyq prokýratýranyń baspasóz qyzmeti.
Prokýratýranyń málimetinshe, bilim berý mekemelerin ystyq tamaqpen qamtamasyz etetin kásipkerler memlekettik organdar tarapynan tekserý táýekeline kóbirek ushyraıdy. Osyǵan oraı qoldanystaǵy zańnama men moratorıı tártibin túsindirý maqsatynda Atyraý qalalyq prokýratýrasy kásipkerlermen kezdesý ótkizdi. Oǵan óńirlik kásipkerler palatasy men kásipkerlik bólimniń ókilderi qatysty.