Atyraýda kásipkerlerdiń kómegimen kóshe jaryqtandyrý jumystary qolǵa alynady
ATYRAÝ. QazAqparat - Atyraýda kósheni jaryqtandyrý jumystary memlekettik jekemenshik áriptestik (MJÁ) aıasynda júzege asyrylýda, dep habarlaıdy QazAqparat óńirlik kommýnıkatsııalar qyzmetine silteme jasap.
Atyraý oblysynda memlekettik jekemenshik áriptestik júıesiniń teńdessiz jobasy júzege asyrylýda.
«Atyraýda kósheni jaryqtandyrý jelisiniń qurylysy bastalady. Olar jaryq dıodty retteletin jaryqpen qamtylady. Ol qalanyń 39 kóshesinde paıda bolmaq. Jobanyń negizgi paıdasy, táýekeli memleket pen bıýdjetke teń bólinedi, bıýdjetke júkteme tómendeıdi. MJÁ úlgisin qoldaný kezinde dástúrli memlekettik satyp alýlarmen salystyrǵanda, qurylys sapasy barynsha joǵary bolady, sebebi onyń ári qaraı paıdalanýyna jekemenshiktegi áriptes jaýap beredi. Jobanyń taǵy bir ıgiligi - jekemenshik ıesiniń kirisi kórsetilgen qyzmet sapasyna baılanysty. Qujattama daıyndaýǵa osy jobany súıemeldeý boıynsha konsýltant retinde «Qazaqstandyq memlekettik-jeke áriptestik ortalyǵy» AQ tartyldy», - dep habarlady AQ sarapshysy Shynasyl Ernazar.
Jobany «Batys tranzıt» AQ iske asyrady. Bul Atyraýda kósheni jaryqtandyrýdy qolǵa alǵan alǵashqy jekemenshik kompanııa. «Batys tranzıt» AQ kompanııasynda sátti memlekettik-jekemenshik áriptestik tájirıbesi bar. 2015 jyly kásiporyn Soltústik Qazaqstandy Aqtóbe oblysymen biriktiretin elektr qýatyn berý óńiraralyq jelilerin salýǵa qatysqan. Endi bul uıym memlekettik-jekemenshik áriptestik qaǵıdattarynda basqa áleýmettik-baǵdarlanǵan jobalar boıynsha jumysyn jalǵastyratyn bolady.
