Atyraýda kásipkerler bazarlar men saýda oryndaryn ashýdy talap etti
ATYRAÝ. QazAqparat –Atyraý oblysynda Jylyoı aýdanynyń ortalyǵy –Qulsary qalasynda bir top shaǵyn jáne orta kásipkerlik ókili jergilikti ákimdik aldyna jınalyp, óz talaptaryn qoıýda. Negizgi talap – bazarlar men saýda oryndaryn ashý, dep habarlaıdy QazAqparat.
Atyraý oblysy ákimi baspasóz qyzmetiniń habarlaýynsha, Jylyoı aýdannyń bas sanıtarlyq dárigeri T.Habıbýllınniń qaýlysyna sáıkes, munda 18 maýsymǵa deıin karantın jarııalanǵan. Atalǵan qaýlyǵa saı, koronavırýs dertiniń taralyp ketpeýi úshin barlyq azyq-túlik satpaıtyn saýda oryndary men bazarlardyń jumys isteýine ruqsat berilmegen.
«Óıtkeni, sońǵy málimetter boıynsha, Jylyoı aýdany aýmaǵynda ornalasqan Teńiz keń ornynda 1013 koronavırýs ınfektsııasyn juqtyrý jaǵdaıy tirkelse, aýdannyń eldi mekenderinde 43 jaǵdaı anyqtaldy. Onyń 33-i Qulsary qalasynan shyqty. Bul naýqastardyń ekeýi kúni keshe qaıtys boldy» -dep habarlady oblys ákiminiń baspasóz qyzmeti.
Qazirgi kezde jınalǵan kásipkerlermen memlekettik jáne quqyq qorǵaý organdarynyń ókilderi kezdesip, túsindirý jumysyn júrgizip jatyr. Olardyń arasynda Jylyoı aýdanynyń ákimi men aýdannyń bas sanıtarlyq dárigeri de bar. Oblys ákimi Mahambet Dosmuhambetovtiń tapsyrmasymen Qulsary qalasyna oblys ákiminiń birinshi orynbasary Nurlan Taýbaev attanǵan.
Eske sala ketelik, buǵan deıin Atyraýda koronavırýstan eki adamnyń qaıtys bolǵanyn, onyń biri úıinde bir apta jatyp qalǵanyn habarlaǵan bolatynbyz.
