Atyraýda káriz-tazartý kesheniniń qurylysy qyrkúıekte aıaqtalady
ATYRAÝ. QazAqparat –Atyraý qalasynda Jaıyq ózeniniń sol jaǵalaýynda salynyp jatqan káriz-tazartý kesheniniń qurylysyn qyrkúıekte aıaqtalý kózdelip otyr, dep habarlaıdy QazAqparat.
Atyraý oblysy ákiminiń birinshi orynbasary Nurlan Taýbaevtyń aıtýynsha, bul – qalanyń sol jaq jaǵalaý bóligine arnalǵan nysan.
Qazir atalǵan nysanda negizgi qurylys-montaj jumystary aıaqtalǵan. Endi tehnologııalyq jabdyqtardy ornatý, montajdaý, keshendi iske qosý júrgizilýde. Bul jumystardy tolyq aıaqtap, nysandy iske qosý qyrkúıek aıyna josparlanǵan.
«Nysannyń qurylysy 2017 jyldyń qarasha aıynda bastaldy. Atalǵan keshen kanalızatsııalyq stantsııa men tazartý alańdary, tazartylmaǵan jáne tazartylǵan aǵyndardyń qysym kollektory, sondaı-aq, bıologııalyq toǵandar men býlaný alqaptarynyń alańyn qamtıdy. Jańa káriz sýyn tazartý stantsııasy iske qosylǵannan keıin, birneshe jyldan beri qala turǵyndarynyń shaǵymyn týdyrǵan «Sasyq saı» alańy jabylady» -deıdi oblys ákiminiń birinshi orynbasary Nurlan Taýbaev.
Mamandardyń aıtýynsha, sarqyndy sý býlaný alqabyna túspes buryn, káriz-tazartý stantsııasynyń kómegimen tazartýdyń tolyq kezeńinen ótedi. Bul káriz sýyn ǵana emes, sonymen birge, jer asty sýyn, topyraq pen aýany tazartýǵa jol ashpaq.
Buǵan deıin Atyraýda 20 kompanııanyń 809 mamandy jumysqa qabyldaýǵa daıyn ekenin jazǵan edik.
