Atyraýda káriz kollektoryndaǵy aqaýdan bir shaǵyn aýdan sýsyz qaldy
Atyraý qalalyq ákimdigi baspasóz qyzmetiniń málimetinshe, Balyqshy shaǵyn aýdanyndaǵy káriz kollektorynda aqaý anyqtalǵan.
«Balyqshy shaǵyn aýdanynda káriz kollektorynda aqaý shyqty. Osyǵan baılanysty atalǵan shaǵyn aýdanda 20 shildege qaraǵan túni saǵat 00:00-den tańǵy saǵat 06:00-ge deıin sý berý ýaqytsha toqtatylady», -dep habarlady ákimdiktiń baspasóz qyzmeti.
Al, Atyraý oblysynyń energetıkalyq kesheni baspasóz qyzmetiniń aqparatyna qaraǵanda, 20 shildede Balyqshy aýdanynda elektr jaryǵyn ajyratý josparlanyp otyr.
«Jergilikti ýaqytpen saǵat 08:00-19:00 aralyǵynda «Atyraý oblysy Sý Arnasy» KMK qyzmetkerleriniń Balyqshy yqsham aýdanynda apatty qalypqa keltirý jumystary kezinde Qojaqaev kóshesinde ornalasqan №21, Beıbitshilik kóshesiniń №62 mekenjaıdaǵy kóppáterli úıde elektr jaryǵy ýaqytsha bolmaıtynyn qaperge beremiz», -dep málim etti energetıkalyq keshenniń baspasóz qyzmeti.
Eske sala ketelik, buǵan deıin Atyraýdaǵy birneshe eldi mekende taǵy jaryq bolmaıtynyn habarlaǵan edik.
Atyraý oblysynyń energetıkalyq kesheni baspasóz qyzmetiniń málimetinshe, 18 shildede shahar mańyndaǵy birneshe eldi meken men shaǵyn aýdanda jaryqty óshirildi.
«Tańerteńgi saǵat 09:00-den keshki saǵat 18:00-ge deıin Atyraý qalasyndaǵy «Vokzal mańy-3a», Saryqamys, Jeruıyq, Konteınernyı, Nursaıa shaǵyn aýdandary men shahar mańyndaǵy Erkinqala, Bereke, Geolog jáne Birlik eldi mekenderine elektr qýaty ýaqytsha berilmeıdi», -dep málim etken edi baspasóz qyzmetinen.
