Atyraýda qarııany óltirgen qaskúnem 17 jylyn temir tordyń ar jaǵynda ótkizedi
ASTANA. QazAqparat - Atyraý oblysynyń qylmystyq ister jónindegi mamandandyrylǵan aýdanaralyq sotynda jalǵyz basty zeınetkerdi óltirgen qaskóıge qatysty qylmystyq is qaraldy.
Tergeý deregine sáıkes, Aqqystaý selosynyń turǵyny M.A. zeınetker K.S.-niń jalǵyz turatynyn, jınaq aqshasy bar ekenindigin bilip, jasyryn páterine kirip, 334 721 teńge aqshasyn jymqyrǵan, dep habarlaıdy Atyraý oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzzmeti.
Bul oqıǵaǵa zeınetker óziniń kórshisi men onyń úıine jıi keletin inisi M.A. -dan kúdiktengen. Sóıtip bir kúni qarııa úıdiń dálizinde kórshisin kezdestirip, odan urlanǵan aqshany qaıtarýdy talap etedi.
Sol sátte qarttyń qatty daýysyn estigen M.A. aǵasynyń úıinen júgire shyǵyp, qolyna alǵan baltamen páterine kirip bara jatqan zeınetkerdiń moıyn tusynan soǵady. Qarııany úıine súırep kirgizip, ózi qashyp ketedi.
Biraz ýaqyttan keıin qylmysty jasyrý úshin, adam ólimi bolǵan jerge qaıta oralyp, múrdeni kilemge orap, úıden alyp shyǵyp, kóshedegi káriz qudyǵyna laqtyryp jiberedi.
Sot úkimimen M.A. Qazaqstan Respýblıkasynyń QK-niń 188-babynyń 2-bóliginiń 3-tarmaǵymen (urlyq), 99-babynyń 2-bóliginiń 10-tarmaǵymen (kisi ólimi) kináli dep tanylyp, múlki tárkilenip, 17 jylǵa bas bostandyǵynan aıyrý jazasy taǵaıyndaldy.
Jazany óteý orny «erekshe rejimdegi" túzeý kolonııasy bolyp belgilendi.
Sot úkimi zańdy kúshine endi.
