Atyraýda kardıologtar alǵash ret júrekke arıtmologııalyq ota jasady
ATYRAÝ. QazAqparat – Atyraýda kardıologtar alǵash ret júrekke arıtmologııalyq ota jasaýdy qolǵa aldy, dep habarlaıdy QazAqparat.
Oblystyq kardıologııa ortalyǵynyń bas dárigeri Marat Qonysovtyń aıtýynsha, atyraýlyq kardıologtar joǵary tehnologııalyq qurylǵymen alǵashqy biregeı otany sátti ótkizgen. Munda AQSh-taǵy ST. JUDE kompanııasynyń «En Site Precision» 3 ólshemdi júrek kartasynyń elektroanatomııalyq júıesi engizilgen.
«Jańa medıtsınalyq qurylǵymen júrek yrǵaǵy buzylýynyń kúrdeli formalaryna ınterventsııalyq arıtmologııalyq ota jasaýǵa bolady. Qazir flıýroskopııalyq qoldaý arqyly ınterventsııalyq arıtmologııalyq ota (radıojıilikti ablıatsııa) jasalyp jatyr.
Elektroanatomııalyq júıeni engizý ota kezinde medıtsınalyq personal men patsıentke túsetin sáýleniń júktemesi azaıady. Bul – Atyraý oblysynda ınterventsııalyq arıtmologııalyq qyzmetti damytýdaǵy eleýli qadam», - deıdi Marat Qonysov.
Onyń aıtýynsha, jańa ádis joǵary tehnologııalyq medıtsınalyq ota (HTMU) ekenin eskerý kerek. Júıe 3D keskininde anatomııalyq kartany qurýǵa, arıtmııa oshaǵyn dál anyqtaýǵa, sondaı-aq patsıent pen zerthananyń medıtsınalyq qyzmetkerleri alatyn
sáýle dozasyn tómendetýge, elektroanatomııalyq navıgatsııany qoldaný arqyly ony joıýǵa múmkindik beredi.
Eske sala ketelik, buǵan deıin Atyraýda elordalyq dárigerler 5 balaǵa ota jasap, 300-ge jýyq keńes bergenin jazǵan bolatynbyz.
