Atyraýda karantındik shekteý qaıta kúsheıtildi
ATYRAÝ. QazAqparat –Atyraý oblysynyń bas memlekettik sanıtarlyq dárigeriniń qaýlysymen karantındik shekteý sharalary qaıta kúsheıtildi, dep habarlaıdy QazAqparat.
«Atyraý qalasy men Atyraý oblysy aýmaǵynda karantındik shekteý sharalarynyń qoldanylýy epıdemıologııalyq jaǵdaı tolyqtaı turaqtanǵanǵa deıin sozylsyn»,- delingen Atyraý oblysynyń bas memlekettik sanıtarlyq dárigeri Amantaı Jumaǵalıevtiń qaýlysynda.
Qaýlyǵa sáıkes, turǵyndar men jeke kólikterdiń túngi saǵat 23:00-den tańǵy 06:00-ge júrýine, sondaı-aq, oıyn-saýyq, sporttyq jáne basqa da buqaralyq is-sharalardy, otbasylyq, eske alý sharalaryn (banketter, úılený toılary, mereıtoılar, as berýler), sonyń ishinde úıde jáne adamdar kóp jınalatyn ózge de is-sharalardy ótkizýge, qoǵamdyq oryndarǵa, onyń ishinde alańdarǵa, saıabaqtarǵa, jaǵalaýlarǵa barýǵa, menshik nysanyna qaramastan barlyq mektepke deıingi balalar uıymdarynyń qyzmetine tyıym salynǵan.
Qala syrtyndaǵy saýyqtyrý ortalyqtarynyń jáne mektep janyndaǵy lagerlerdiń, kınoteatrlardyń, teatrlardyń, kórmelerdiń, ınternet pen kompıýterlik oıyn klýbtarynyń jáne adamdar kóp shoǵyrlanatyn basqa da nysandardyń qyzmeti toqtatylǵan.
Sondaı-aq, dinı nysandar qyzmetine jáne halyqtyń onda barýyna tyıym salynyp otyr.
Buǵan deıin Atyraýda Ulttyq saraptama ortalyǵynyń dırektory men 13 qyzmetkeri koronavırýs juqtyrǵan bolatyn.
