Atyraýda karantındi buzǵandarǵa 8,3 mln teńgeniń ákimshilik isi qozǵaldy
ATYRAÝ. QazAqparat –Atyraý oblysynda 8,3 mln teńge kóleminde 47 ákimshilik is qozǵaldy. Bul týraly oblystyń bas memlekettik sanıtarlyq dárigeri Sadýaqas Baıǵabylov málim etti, dep habarlaıdy QazAqparat.
Onyń aıtýynsha, mobıldik toptardyń reıdtik tekseristeri kezinde karantın talabyn buzǵan birneshe derek anyqtalǵan. Jabyq ǵımarattarda maska rejımin, áleýmettik qashyqtyqty saqtamaý sekildi ózge de talaptardy buzǵandarǵa 8,3 mln teńgeniń ákimshilik isi qozǵalǵan.
«Jeke tulǵalarǵa 24, orta jáne shaǵyn kásipkerlik sýbektisine (19 dúken, 2 kólik jóndeý ortalyǵy) 23 aıyppul salyndy. Tek Atyraý qalasynda bazarlar, sýpermarketter men turǵyn úılerde ornalasqan dúkenderde maska taqpaǵan 17 jeke tulǵa 30 aılyq eseptik kórsetkish mólsherindegi aıyppul jazasyna tartyldy. Al, Jylyoı aýdanynda karantın talabyn saqtamaǵandar 11 aıyppul arqalady. Onyń ishinde 7 jeke tulǵa, 4 shaǵyn jáne orta kásipkerlik sýbektisi bar. Sondaı-aq, Inder aýdanynda ýaqytsha jumys kestesin saqtamaǵan kásipkerlik nysandaryna 2 aıyppul salyndy», -dedi Sadýaqas Baıǵabylov.
Mobıldi toptarmen reıd kezinde qamtylǵan 1014 nysannyń 14-de kemshilikter sol mezette sheshimin tapqan. Mundaı kemshilikter arasynda esik tutqalaryn, saýda sóresin, tehnologııalyq jabdyqtardy, shatyr men qoqys salǵyshtardy dezınfektsııalyq eritindimen óńdeý bar. Al, ózge nysandarda gıgıenalyq saýattylyqty arttyrý, karantındi saqtaý jóninde broshıýralar taratylyp, profılaktıkalyq áńgime júrgizilgen.
Eske sala ketelik, buǵan deıin Atyraý halqy dári-dármek baǵasyna shaǵymdanǵannan keıin 50 dárihana tekserilgen edi.
