Atyraýda karantın talaptaryn qaıtalap buzatyn kásipkerler azaımaı tur
ATYRAÝ. QazAqparat –Atyraý qalasynda karantın rejımin buzǵan 1 myńǵa jýyq kásipkerlik nysan anyqtaldy. Onyń ishinde shekteý sharalaryn qaıtalap buzatyndar azaımaı tur, dep habarlaıdy QazAqparat.
Oblystyq Polıtsııa departamenti baspasóz qyzmetiniń málimetinshe, shekteý sharalaryn buzǵandardyń arasynda oıyn-saýyq oryndary, sulýlyq salondary men monsha, dúken sekildi kásipkerlik nysandary bar.
«Mobıldik top quramymen reıd kezinde karantın rejımin buzǵan birneshe derek anyqtalyp otyr. Atap aıtqanda, Stýdentter dańǵylynda ornalasaqan «Lıft» meıramhanasy, Avangard-4 shaǵyn aýdanyndaǵy «Esperanzo» kafesi, Vokzal mańy shaǵynaýdanynda «Doner» dúńgirshegi, Vodnık eldi mekeninde «Begis» azyq-túlik dúkeni, M.Gorkıı kóshesinde «Ryba moeı mechty» karaoke klýby, S.Datov kóshesinde «Atameken» monshasy belgilengen ýaqyttan keıin jumysyn jalǵastyryp, talapty buzǵan.
Anyqtalǵan kásipkerlik nysandardyń ishinde buǵan deıin karantın rejımin buzyp, QR Ákimshilik quqyqbuzýshylyq týraly kodekstiń 425-babymen jaýapkershilikke tartylǵanyna qaramastan, qaıtalap quqyq buzǵandar bar. Máselen, «Lıft meıramhanasy 3, «Ryba moeı mechty» karaoke klýby 7-shi ret karantın talabyn buzyp, saǵat 22:00-den keıin jumys istegen», - dep habarlady depatramenttiń baspasóz qyzmetinen.
Shilde aıynan beri Atyraý qalasynda karantın tártibin buzǵan 1 myńǵa jýyq kásiporyn ıelerine 75 mln teńge aıyppul salynyp otyr.
Eske sala ketelik, budan buryn Atyraýda monıtorıngilik toptyń jumysy kúsheıtiletinin habarlaǵan edik.
