Atyraýda karantın rejımi jeńildetildi

ATYRAÝ. QazAqparat – Atyraý oblysynda karantındik sharalardy jeńildetý týraly sheshim qabyldanyp, birqatar nysandarǵa jumystaryn qaıta bastaýǵa ruqsat etildi, dep habarlaıdy QazAqparat.

Ortalyq kommýnıkatsııalar qyzmetiniń óńirlik fılıalynyń habarlaýynsha, Memleket basshysynyń «Qazaqstan Respýblıkasyndaǵy tótenshe jaǵdaıdy uzartý týraly» 2020 jylǵy 27 sáýirdegi málimdemesine sáıkes, Atyraý oblysynyń bas memlekettik sanıtarlyq dárigeri ruqsat etilgen qyzmet túrleriniń tizbesin keńeıtýge qatysty qaýly shyǵarǵan.

«Atap aıtqanda, endi óńirde tek azyq-túlik taýarlaryn satatyn saýda núktelerimen qosa, aýylsharýashylyq tehnıkalary, qural-jabdyqtar, tyńaıtqyshtar jáne tuqymdar satatyn dúkender de ashylady. Sonymen qatar, ónerkásiptik kásiporyndar jumysyn jalǵastyrady. Onyń ishinde qurylys jáne jol qurylysy salasyndaǵy kompanııalar, iri qurylys dúkenderi men kólik, qoıma, aýylsharýashylyq qyzmet kórsetý salasyndaǵy kompanııalarǵa qyzmetin qaıta bastaýǵa ruqsat etildi. Avtosalondar, qyzmet kórsetý stantsııalary, avtojýý, shınalarǵa qyzmet kórsetý, avto bólshekter satatyn dúkender, hımııalyq tazartqyshtar, turmystyq jáne orgtehnıkany jóndeý, notarıaldyq qyzmetter men shtattyń 50%-y ruqsat etilgen ekinshi deńgeıdegi bankter de qyzmetin jalǵastyrady. Budan bólek, keshki saǵat 21:00-ge deıin jetkizý qyzmeti bar tamaqtandyrý oryndary jumys isteıdi» delingen qaýlyda.

Bul nysandar jumysty qaıta bastaý úshin barlyq sanıtarlyq-epıdemıologııalyq talaptardy qatań saqtaýǵa mindetteledi. Sanıtarlyq tazartqyshtardyń, medıtsınalyq betperdeler men qolǵaptar sekildi qorǵanysh zattary bolýy qajet. Oǵan qosa, jumys ornynda tamaqtanýǵa tyıym salynady. Al, oblys turǵyndary turǵylyqty mekenjaıy nemese jumys ornyna jaqyn ornalasqan atalǵan nysandarǵa bara alady. Áli de iri saýda-oıyn-saýyq ortalyqtarynyń, bazarlardyń, kınoteatrlardyń, monsha keshenderiniń, kompıýterlik klýbtardyń, fıtnes-ortalyqtardyń, turmystyq tehnıka dúkenderiniń, kıim-keshek dúkenderiniń jáne adamdar kóp jınalatyn basqa da oryndardyń qyzmetine tyıym salynǵan.

Sondaı-aq, qala kóshelerinde turǵyndardyń sebepsiz júrýine bolmaıdy. Al, kógaldandyrý aımaǵy bar jáne saıajaı ıeleri óz ýchaskelerine senbi men jeksenbi kúnderi tańerteńgi saǵat 06:00-den 09:00-ge, keshki 17:00-den 20:00-ge deıin baryp-kelýge ruqsat etiledi.