Atyraýda qar qursaýynda qalǵan 63 adam qutqaryldy
ATYRAÝ. QazAqparat – Atyraý oblysynda bir aptada qar qursaýynda qalǵan 63 adam qutqaryldy. Onyń ishinde 5 bala bar, dep habarlaıdy QazAqparat.
Sońǵy bir aptadan beri Atyraýda qolaısyz aýa-raıy qalyptasyp otyr. Osyǵan baılanysty oblystyq Tótenshe jaǵdaılar departamentinde arnaıy shtab quryldy.
Atalǵan shtab quramyna jergilikti polıtsııa qyzmetiniń, «QazAvtoJol» UK» AQ óńirlik
fılıalynyń ókilderi engen.
«Óńir turǵyndaryna mobıldi baılanys operatorlarynyń kómegimen aýa-raıynyń
qolaısyzdyǵy týraly daýyldy eskertý týraly sms-habarlama jiberildi. Soǵan qaramastan, 22 aqpanda saǵat 20:17-de mal izdeýge shyqqan azamattyń úıine oralmaǵany týraly habar tústi. Maqat aýdandyq tótenshe jaǵdaılar bóliminiń qyzmetkerleri jergilikti atqarýshy organdarmen birge izdestirý jumysyn júrgizdi. Sonyń nátıjesinde 23 aqpanda saǵat 00:44-te «Maqat-Inder» temir jolynyń 20-shy shaqyrymynan joǵalǵan azamat tabylyp, úıine jetkizildi», - dep habarlady departamenttiń baspasóz qyzmetinen.
Sondaı-aq, 22 aqpanda saǵat 19:08-de Jylyoı aýdanyndaǵy Shoqpartoǵaı aýyly men Qulsary qalasy arasyndaǵy jolda qar qursaýynda kólik turyp qalǵan. Onyń ishinde 4 jolaýshy bolǵan. Qutqarýshylar «Trekol» arnaıy jol talǵamaıtyn kólikpen saǵat 20:32-de Qulsary qalasynan 15 shaqyrym qashyqtyqta turyp qalǵan «Nıva» avtokóligin taýyp, jolaýshylaryn úıine jetkizgen.
«Aýa-raıynyń qolaısyzdyǵyna baılanysty 23 aqpanda saǵat 17:00-de barlyq baǵyttaǵy respýblıkalyq, oblystyq mańyzy bar avtojoldy jabý týraly sheshim qabyldandy. Biraq, eskertýlerge qaramastan, adamdar joǵalyp, tehnıkalardyń jolda turyp qalǵany týraly derekter tirkeldi. Máselen, Qyzylqoǵa aýdanyndaǵy Saǵyz stantsııasynan 10 shaqyrym jerde qar keptelisinde 3 júk, 8 jeńil avtokólik qalǵan. Bularda 34 adam bolǵan, onyń 5-ýi kámeletke tolmaǵan balalar. Tótenshe jaǵdaılar departamentiniń qyzmetkerleri kólikterdi tazartylǵan ýchaskege, adamdardy eldi mekenderge jetkizdi», -dedi baspasóz qyzmetinen.
Sondaı-aq, 23 aqpanda Isataı aýdanynda turatyn 41 jastaǵy azamat 2006 jáne 2007 jyly týǵan balalarymen birge Batys Qazaqstan oblysyna barý úshin qara jolmen (tóte jol) shyǵyp ketken. Biraq, olardan eshqandaı habar bolmaǵan. Sol sebepten, izdestirý-qutqarý toptary quryyp, joǵalǵan azamat balalarymen birge 24 aqpanda saǵat 15:30-da aýdan
ortalyǵy – Aqqystaý aýylynan 80 shaqyrym jerdegi «Nasıhat» qystaǵynan tabyldy.
Aıta ketken jón, Atyraý oblysynda aýa-raıynyń qolaısyzdyǵyna baılanysty turǵyndardyń joǵalý deregi kóbeıdi. Tek 17-24 aqpanda qar qursaýynda qalǵan 63 adam (58 eresek adam, 5 bala) qutqarylyp, qaýipsiz jerge jetkizildi. Sondaı-aq, qarǵa maltyqqan 10 tehnıkaǵa kómek kórsetildi.
Eske sala ketelik, budan buryn Atyraý oblysynda 150 qoıymen birge joǵalyp ketken egde jastaǵy adam tabylǵanyn habarlaǵan edik.
