Atyraýda qar basty, kommýnaldyq qyzmetter qaýyrt jumys isteýde
ATYRAÝ. QazAqparat - Qarly boran Atyraýdy da aınalyp ótpedi. Ótken túnde qalanyń kommýnaldyq qyzmetteri qaýyrt jumys istedi, dep habarlaıdy «QazAqparat» HAA tilshisi.
«Qalada 12 qańtar kúni tús aýa qar jaýa bastady. Sınoptıkter tańǵa deıin tolastamaıdy dep boljam jasady. Sondyqtan Atyraý qalasynyń ákimi Serik Shápkenovtiń tapsyrmasymen «Arnaıy avtobaza» JShS-nyń qar kúreıtin tehnıkalary bes topqa bólinip, jumys istedi. Kóktaıǵaqtyń aldyn alý maqsatynda kópirler men joldarǵa úsh rezervýar qum septi. Barlyǵy 28 arnaıy tehnıka jumyldyryldy. Tańǵa deıin qalanyń ishindegi joldarmen qosa, qala mańyndaǵy aýyldyq okrýgterdiń de joldary qardan tazartyldy», - dep málimdeme jasady qala ákimdiginiń baspasóz qyzmeti.
Qazir qar toqtady. Qardan tazartý jumystary jalǵasyp jatyr. 
«Aýa raıyn úzbeı baqylap, táýlik boıy jumys istep jatyrmyz», - deıdi «Arnaıy avtobaza» JShS dırektorynyń orynbasary Kımeıadın Shmanov.
