Atyraýda qańtar oqıǵasynda urlanǵan oq-dáriler Jaıyq jaǵasynan tabyldy
Atyraý oblysy boıynsha qylmystyq-atqarý júıesi departamentiniń baspasóz qyzmetinen málim etkendeı, tergeý ızolıatorynda otyrǵan qańtar oqıǵasyna qatysqan kúdiktiniń biri tergeýshige oq-dárilerdiń saqtalǵan orny týraly aıtýǵa sheshim qabyldaǵan.
«Osyǵan baılanysty óńirlik departamentke qarasty №75 mekeme qyzmetkerleri Atyraý oblystyq polıtsııa departamentiniń uıymdasqan qylmysqa qarsy basqarma qyzmetkerlerimen birlesip, jedel izdestirý is-sharasyn ótkizdi. Sonyń nátıjesinde Jaıyq ózeniniń Atyraý qalasyndaǵy «Balyqshy» shaǵyn aýdany tusyndaǵy jaǵasynan oq-dárileri kómilgen oryndy anyqtady. Oq-dáriler polıetılen paketke salynǵan. Pakettiń ishinde dybys shyǵaratyn 12 granata, «Fiacah 410 mag» myltyǵyn oqtaýǵa arnalǵan 6 patron, sondaı-aq, 5,45 mıllımetr kalıbrli 119 patron tabyldy», - dep habarlady Atyraý oblysy boıynsha QAJD baspasóz qyzmeti.
Eske sala ketelik, budan buryn qańtar oqıǵasyna qatysqan 27 atyraýlyqtyń isine qatysty sot 19 qyrkúıekte bastalǵan edi.
Keıin Qańtar oqıǵasyna qatysqan atyraýlyqtyń biri tergeý ızolıatoryna qamaýǵa alynǵanyn jazǵan bolatynbyz.
Sottalýshynyń biri 3 qazanǵa taǵaıyndalǵan basty sot otyrysyna kelmegen. Alaıda, sot otyrysyna kelmeý sebebin habarlamaǵan. Sot otyrysy hatshysynyń jáne advokatynyń birneshe ret shalǵan qońyraýyna jaýap bermegen. Al, 3 qazandaǵy narkologııalyq anyqtamaǵa sáıkes sottalýshynyń masań kúıde ekeni anyqtalǵan. Oblystyq qylmystyq ister jónindegi mamandandyrylǵan aýdanaralyq soty sol kúni sottalýshyny kúzetpen ustaý túrindegi bultartpaý sharasyn qoldanýǵa qaýly shyǵardy.
