Atyraýda qańǵybas ıt talaǵan 5 jasar qyz aýrýhanaǵa jetkizildi
ATYRAÝ. QazAqparat – Atyraýda qańǵybas ıt talaǵan 5 jasar qyz aýrýhanaǵa jetkizildi, dep habarlaıdy QazAqparat.
Atyraý qalasynyń turǵyny Ásem Baıjannyń aıtýynsha, qańǵybas ıt onyń balalaryna da, ózine de birneshe ret shabýyl jasaǵan.
«Qabaǵan ıt byltyr meni talamaq boldy. Osyǵan baılanysty zootehnıkterdiń ártúrli toptaryna jazba qaldyrdym. Olar meniń ózimdi kináli etti. 2022 jyldyń 7 mamyrynda saǵat 18:30-da Azattyq kóshesinde dál osy ıt bes jasar jıenim Safııany qaýyp aldy», -dep jazdy ol Facebook paraqshasynda.
Oblystyq balalar aýrýhanasynyń baspasóz qyzmeti bul derekti rastady.
«Atyraý qalasynyń turǵyny 5 jasar turǵyny Safııa R. 7 mamyr kúni keshki saǵat 19:20-da oblystyq balalar aýrýhanasyna jetkizildi. Kezekshi dáriger-travmatologtyń aıtýynsha, buralqy ıt balanyń sol jaq betin, joǵary jáne tómengi ernin birneshe ret tistegen. Aýrýhanada balanyń betindegi jaraqaty tigildi. Qutyrýǵa qarsy vaktsına salyndy. Qazir bala úıine jiberildi. Endi turǵylyqty mekenjaıy boıynsha emhanada emdeledi», -dep habarlady aýrýhananyń baspasóz qyzmeti.
Atyraýda buralqy ıt máselesi turǵyndardy alańdatyp otyr.
Osyǵan oraı bir top ana Retrosaıabaqqa jınalyp, kóshedegi qańǵybas ıtterdi atýǵa ruqsat berý máselesin kótergen edi.
Qala turǵyny Zýhra Ilıasovanyń aıtýynsha, №21 mekteptiń janynda únemi 5-6 ıt júredi. Jaqynda qańǵybas ıt 5-synyp oqýshysyn qaýyp alǵan.
«Meniń balam ıt qapqan oqýshymen birge oqıdy. Mekteptiń janynda birneshe ıt balalarǵa úrip, úreı týǵyzyp júredi. Balalarymyz úshin qorqamyz», -deıdi Zýhra Ilıasova.
Eske sala ketelik, budan buryn Atyraýda byltyrǵy jeti aıda 38 adamdy ıt qapqanyn jazǵan edik.
