Atyraýda kanal jaǵasyndaǵy 3 gektar aýmaqta qamys órtendi
Oblystyq tótenshe jaǵdaılar departamenti qoǵammen baılanys tobynyń málimetinshe, qamys órti týraly 15 naýryzda saǵat 16:38-de habar túsken.
«Atyraý qalasynyń mańyndaǵy Novokırpıchnyı eldi mekeninde ornalasqan kanaldyń jaǵasynda qamys órtendi. Jalyndy sóndirýge órt sóndirý jáne avarııalyq-qutqarý jedel qyzmetiniń 9 qyzmetkeri men 3 arnaıy tehnıka tartyldy. Órt sóndirýshiler oqıǵa ornyna jetken kezde «Ataqonys» sharýa qojalyǵynyń aýmaǵynda dalalyq shóptiń janyp jatqany anyqtaldy. Qamys órti 3 gektar aýmaqqa jaıylǵan. Jalyn keshki saǵat 19:50-de tolyqtaı sóndirildi», -dep habarlady departamenttiń qoǵammen baılanys tobynan.
Eske sala ketelik, budan buryn Atyraýda aýlasynda alaý jaqqan mekteptiń dırektoryna qatań sógis berilgenin habarlaǵan bolatynbyz.
Atyraý qalasyndaǵy Ó.Atambaev atyndaǵy №8 mektepte Maslennıtsa merekesi atap ótilgen. Soǵan oraı mektep aýlasynda alaý jaǵylǵan. Alaý anynda oqýshylar tur.
Oblys ákiminiń orynbasary Jasulan Bısembıevtiń aıtýynsha, mundaı is-sharany mektepte ótkizýge bolmaıdy.
«Dinı sıpaty bar is-shara mekteptiń bazasynda ótken. Biraq, qaýipsizdikti saqtaý úshin tótenshe jaǵdaılar organdarymen kelisilmegen. Atyraý qalalyq bilim bólimine de habarlanbaǵan. Mekteptiń dırektory ata-analar usynysyn qoldap, bilim ordasynyń aýlasynda alaý jaǵýǵa ruqsat bergen. Osyǵan baılanysty mekteptiń dırektoryna qatań sógis berildi», -dep málim etti Jasulan Bısembıev.