Atyraýda qaldyqtardy suryptaý kesheni iske qosyldy
ATYRAÝ.QazAqparat- Atyraýda iske qosylǵan qaldyqtardy suryptaý kesheni 7 túrli qaldyqty suryptaıdy, dep habarlaıdy QazAqparat tilshisi.
Keshenniń ashylýyna tabıǵı resýrstar jáne tabıǵat paıdalanýdy retteý basqarmasynyń basshysy Qadyrjan Arystan jáne qala ákiminiń orynbasary Ulyqbek Tnalıev qatysyp, jańa kásiporynnyń jumysymen tanysty.
«Qazirgi tańda qala turǵyndarynyń yńǵaılylyǵy úshin turmystyq qaldyqtardy túrine qaraı bólip jınaqtaıtyn qoqys jáshikteri ornatylýda. Bul qaldyqtardy suryptaý jumystaryna da oń yqpal etedi. Munyń barlyǵy ekologııalyq ahýaldyń jaqsarýyna septigin tıgizedi. Alaıda, ár ıgi istiń bastamashysy sizder men bizder. Sol sebepti qala tazalyǵynyń saqtalýyna birigip atsalysaıyq»,- dedi qala ákiminiń orynbasary Ulyqbek Tnalıev.
Aıta keteıik, «Arnaýly avtobaza» JShS–niń málimetinshe qaladan táýligine 250–300 tonnaǵa deıin qoqys shyǵarylady.
«Keshen jeke ınvestor esebinen Belarýstaǵy «Sıfanııa - Ekotehnıka» kompanııasynan satyp alyndy. Satyp alynǵan jabdyqtar jylyna 100 myń tonna qatty qaldyqtardy mýnıtsıpaldyq qaldyqtardy suryptaýǵa arnalǵan. Munda ázirge 35 adam jumyspen qamtylǵan«, - deıdi «Arnaýly avtobaza» JShS dırektorynyń mindetin atqarýshy Almas Іztileýov.
Keshenge ákelingen qoqys býnkerge túsirilip, sodan keıin kólbeý konveıer arqyly kabınanyń ishindegi suryptaý tasbasyna tikeleı túsedi. Sol jerde qaldyqtardan paıdaly zattar – qaıtalama polımer, plastık bótelkeler, makýlatýralar, toqyma ónimderi, metall synyqtary, shyny jáne synǵan áınekter suryptalady. Taspaly konveıer uzyna boıy suryptalǵan qoqysqa arnalǵan konteıner ydystarmen jaraqtalǵan. Janbaıtyn organıkalyq fraktsııalar burynǵysha joıylatyn bolady.
