Atyraýda qalanyń eski bóligindegi úılerdi súrý jumystary bastaldy
ATYRAÝ. QazAqparat - Atyraýda qalanyń eski bóligindegi úılerdi buzý jumystary bastaldy, dep habarlaıdy QazAqparat tilshisi.
Qala ákimdiginiń baspasóz qyzmetinen málim etkendeı, áleýmettik nysandardy salý maqsatynda Atyraýdyń eski bóliginde ornalasqan úılerdi súrý jumystary bastaldy. Bastapqy kezeńde Jarbosynov kóshesinde ornalasqan 14 úı buzylady. 8 ortalyq kóshede ornalasqan 110 úıdiń ıesi baspanalaryn súrgizýge jáne ótemaqy alýǵa kelisken.
«Jalpy tizim boıynsha, jalpy aýmaǵy 18 gektar bolatyn 271 úı buzylýy tıis. Jumystardy aıaqtaý kezeńi úı ıelerine baılanysty - kommýnaldyq tólemderdiń tóleýi, ótemaqy alýǵa kelisim berýi jáne jańa úıge kóshýi qajet. Jospar boıynsha qalanyń eski bóligin buzý jumystary 2019 jyldyń naýryz aıyna deıin aıaqtalýy kerek»,- deıdi «Bas jospar ortalyǵy» KMM basshysy Jumabek Jumaǵalıev. 
Aıta keteıik, Atyraýdy damytýdyń Bas josparyna sáıkes, qala turǵyndarynyń sany 350 myń adamǵa deıin ósýi múmkin. Al oblys ortalyǵynyń aýmaǵy 3 esege keńeıtilip, 46 myń gektardy quramaq.
Áleýmettik ınfraqurylymnyń qalypty jumys isteýi úshin 2030 jylǵa qaraı qosymsha 83 balabaqsha, 45 mektep, 20 klınıka, 5 aýrýhana, 6 fıtnes-ortalyq jáne 3 mádenıet úıi salynady.
