Atyraýda qala kúnine oraı shahardyń damýyna eleýli úles qosqan azamattar marapattaldy
ATYRAÝ. QazAqparat - Atyraýda qala kúnine uıymdastyrylǵan merekelik sharalar óz máresine jetti. Qala kúni merekesine oraı Qazaqstan men Reseı estradasynyń juldyzdarynyń qatysýymen ótken gala-kontsertke 20 myńǵa jýyq kórermen jınaldy, dep xabarlaıdy QazAqparat tilshisi.
Halyq aldynda Atyraý qalasynyń ákimi Alımuhammed Quttumurat-uly qala oń qarqynmen damyp kele jatqandyǵyn aıtty.
«Bıylǵy jyly Atyraýda rekordtyq deńgeıde turǵyn úı, qala mańyndaǵy aýyldyq okrýgterde jańa joldar salynatyn bolady jáne balabaqshalar men mektepterdiń qurylysy belsendi júrgizilýde. Kósheni jaryqtandyrý boıynsha jobalar iske asyrylyp, qoǵamdyq kólik tujyrymdamasy engizilýde. Qalada shaǵyn jáne orta bıznes sýbektilerin damytý úshin barlyq jaǵdaılar jasalyp otyr. Búgingi kúni otandyq kompanııalar men jer qoınaýyn paıdalanýshylardyń áleýmettik jaýapkershiliginiń arqasynda qala kún saıyn kórkeıip keledi. Atyraýlyq barsha turǵyndardy qala kúnimen quttyqtaımyn jáne Sizderge jáne otbasylaryńyzǵa densaýlyq pen baqyt tileımin», -dedi Alımuhammed Quttumurat-uly.
Sonymen qatar, oblys ortalyǵynda Áleýmettik jáne qaıyrymdylyq jobalardy júzege asyratyn demeýshi kompanııalar men metsenat kásipkerler marapattaldy. Elbasynyń «Bolashaqka baǵdar: rýhanı jańǵyrý» baǵdarlamalyq maqalasyn júzege asyrý aıasynda kásipker Ibragım Aqdrashev, depýtat Álibek Semǵalıev, «Ómir gúli» ansambliniń jetekshisi Tanysh Jakýpova, «KTK jáne K» kompanııasynyń jáne «Wheels brothers» motoklýbynyń ókilderi túrli nomınatsııalarda marapattaldy.
Kórermender aldynda aımaqtyń jergilikti shyǵarmashylyq ujymdary, sondaı - aq, qazaqstandyq jáne reseılik estrada juldyzdary - Mádına Sádýaqasova, Raım men Artýr, Natan jáne MBand óner kórsetti.
Mereke sońynda 20 myńǵa jýyq kórermen mýzykalyq ot shashýdy tamashalady.
