Atyraýda qala kúnine oraı 10 metrlik tort daıyndaldy
ATYRAÝ. QazAqparat - Atyraý qalasynyń qurylǵanyna 378 jyl tolýyna arnalǵan sharalar legi bastaldy, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.
Merekelik sharalar búgin tań ata bastaldy. Ashyq velojarysqa eki myńǵa jýyq adam qatysty. Júldegerler bes atalym boıynsha marapattaldy.
«Qalalyq velojarystar ótken saıyn qatysýǵa nıettilerdiń kóbeıip kele jatqany jáne tek atyraýlyqtar men elimizdiń basqa óńirlerinen ǵana emes, shetelderden de osy sharaǵa arnaıy kelip qatysýshylardyń bary bizdi qýantady. Mysaly, búgin velojarysqa Ázerbaıjannan kelgen týrıst qatysty. Ol TMD, AQSh, Afrıka elderin jaıaý aralap, 10 myń shaqyrymdy baǵyndyrǵan», - deıdi qalalyq sport jáne dene tárbıesi bóliminiń basshysy Rınat Ibragımov.
Sultan Beıbarys alańynda sándik-qoldanbaly buıymdar kórmesi, jergilikti shyǵarmashylyq ujymdar kontserti, ulttyq sport túrlerinen ashyq týrnır uıymdastyryldy. Oblystyq ákimdik aldyndaǵy pırs aýmaǵynda baıdarka men kanoede eskek esýden qalalyq týrnır ótti. Merekeni atap ótý barysynda Atyraýda qala turǵyndaryna arnalyp uzyndyǵy 10 m, eni 80 sm tort pisirildi.
«Búgin Atyraý kezekti jasyn toılap jatyr. Shahar kún sanap kórkeıip, jańa sáýletke ıe bolyp keledi. Qazir oblys ortalyǵynda kóptegen jańa jobalar júzege asyrylyp jatyr, sol arqyly qalamyzdyń sáni kirip, taza, qolaıly bolyp keledi. Barshańyzǵa densaýlyq, otbasylaryńyzǵa baqyt pen bereke tileımin», - dedi qala ákimi Alımuhammed Kuttumurat-uly.
Atyraý qalasy kúnin atap ótý barysynda Nursaıa yqsham aýdanynda 800 oryndyq jabyq akvapark ashyldy. Jańa oıyn-saýyq orny zamanaýı standarttarǵa negizdelgen, munda ár aýysymda 18 qutqarýshy kezekshi bolady.
Merekelik shara 19.00-de Sultan Beıbarys alańynda qazaqstandyq jáne reseılik estrada juldyzdarynyń qatysýymen ótetin gala-kontsertpen aıaqtalady.
23.00-de mereke qonaqtarynyń qurmetine mýzykalyq otshashý bolady.
