Atyraýda qala kúnine arnalǵan merekelik kontsertke 20 myń adam keldi
Atyraý qalasynyń ákimi Álımuhammed Quttymuratuly qala turǵyndary men qonaqtaryn aıtýly merekemen quttyqtady.
«Bizdiń qala qarqyndy damyp keledi. Eski joldar jóndelip, jańa joldar men trotýarlar salynyp jatqanyn bárimiz kórip otyrmyz. Tutas turǵyn shaǵyn aýdandary boı kóterip keledi. Mektepter men balabaqshalar salynyp jatyr. Qalamyz kúnnen-kúnge kórkeıip kele jatyr, jaqynda biz jańarǵan ortalyq alańdy ashtyq, Jaıyq ózeniniń jaǵalaýyn abattandyrý jumysy jalǵasýda. Kún saıyn jańa nysan salynyp jatyr dep aıta alamyz. Osynyń bári - sizderdiń eńbekterińizdiń arqasy. Men ár otbasyna amandyq, beıbitshilik, qut-bereke men kelisim tileımin. Bizdiń munaıly astanamyz gúldenip, órkendeı bersin», - dedi Álımuhammed Quttymuratuly qala turǵyndaryna.
Merekelik shara barysynda áleýmettik jáne qaıyrymdylyq jobalarynyń demeýshilerin, sonymen qatar kásipker-demeýshilerdi marapattaý rásimi ótti. Ár túrli atalymdar boıynsha jeńimpaz atanǵandar negizinen ózderi týyp-ósken Atyraýyn damytý men kórkeıtý jolynda eńbek etip kele jatqan azamattar. Olardyń arasynda «Gaz stroı montaj» JShS basshysy Erlan Tabyldıev, volonter Arman Qasymov, «Júrekten júrekke» qoǵamdyq qorynyń jetekshisi Gúlbaram Ermuhanova, taǵy basqalar bar. Qala kúni úlken merekelik kontsertpen aıaqtaldy. Jergilikti shyǵarmashylyq toptar, qazaqstandyq jáne sheteldik estrada juldyzdary - Ǵadilbek Janaı, Ǵazızhan Shekerbekov, Say Mo jáne Maruv jınalǵan qaýymdy ónerimen tánti etti. Kontsert sońynda merekelik otshashý boldy.
