Atyraýda qabaǵan ıt talaǵan balaǵa búgin taǵy bir ota jasalady
Buǵan deıin Atyraýda 8 jasar balany buralqy ıt talap tastaǵanyn jazǵan edik.
Atyraý oblystyq balalar aýrýhanasy travmatologııa bóliminiń meńgerýshisi Sergeı Hvannyń aıtýynsha, keshe, 15 aqpanda emdeý ornyna ıt talaǵan 2 bala túsken.
Onyń birine qutyrýǵa qarsy vaktsına egilip, alǵashqy medıtsınalyq kómek kórsetilgen. Keıin úıine jiberilgen.
«Al, 8 jasar bala basy men aıaǵynda jaraqaty bar. Qazir ol jansaqtaý bóliminde aýyr jaǵdaıda jatyr. Dárigerler naýqastyń jaraqatyna hırýrgııalyq tazalaý em-domyn júrgizdi. Keıin naýqas jansaqtaý bólimine jatqyzyldy. Naýqasqa antırabııalyq vaktsınalar salynyp, antıbıotıkalyq terapııa bastaldy. Búgin naýqas balaǵa taǵy bir ota jasaý josparlanyp otyr. Aldaǵy ýaqytta naýqasqa birneshe ret hırýrgııalyq em-dom júrgizý qajettigi týyndaıdy», -dep habarlady Sergeı Hvan.
Onyń málimetine súıensek, byltyr kóshede júrgen buralqy ıtten 462 bala zardap shekken.
Al, bıylǵy jyldyń basynan beri aýrýhananyń dárigerlerine ıt qapqan 32 bala júgingen. Zardap shekken balalar ár túrli dene jaraqatyn alǵan.
«Qys mezgilinde kóshe júrgende óte saq bolý kerek. Óıtkeni, qazir kósheden azyq tappaı júrgen ıt kóp. Buralqy ıtter ash bolǵan soń adamdarǵa shabýyl jasaıdy. Ásirese, jas balalardy talap, olardyń ómirine qaýip týdyryp otyr», -deıdi dáriger Sergeı Hvan.
