Atyraýda iz-túzsiz joǵalǵan zeınetkerdi izdeýge tikushaq tartyldy
ATYRAÝ. QazAqparat – Atyraýda iz-túzsiz joǵalǵan zeınetkerdi izdeýge tikushaq tartyldy, dep habarlaıdy QazAqparat.
Budan buryn jazǵanymyzdaı, 29 qańtardan beri Atyraý oblysynda 65 jastaǵy zeınetker izdestirilip jatyr.
Mahambet aýdanynyń Beıbarys aýylynda turǵan zeınetker 28 qańtarda keshki saǵat 19:30 shamasynda úıinen shyǵyp ketken.
Sodan beri áli tabylmaı jatyr.
Keıin ony súńgýirler Jaıyq ózeninen izdedi. Tipti joǵalǵan er adamdy izdeýge kókparshylar da qosylǵan edi.
«Mahambet aýdanynyń Beıbarys aýylyndaǵy úıinen 28 qańtarda belgisiz baǵytqa shyǵyp ketken zeınetkerdi izdestirý is-sharasy áli jalǵasyp jatyr. Ony izdestirýge keshe, 6 aqpanda tikushaq tartyldy. Tikushaqpen Saraıshyq jáne Beıbarys eldi mekenderiniń mańynan 50 shaqyrym radıýsta, Jaıyq ózeniniń boıymen áýeden barlaý júrgizildi. Joǵalǵan zeınetkerdi izdestirýge tótenshe jaǵdaılar departamentinen 4 qyzmetker, «Kazavıaspas» AQ-nyń MI-8 tikushaǵynyń 3 adamdyq ekıpajy men týystarynan 3 adam qatysty», -dep málim etti departamenttiń baspasóz qyzmetinen.
