Atyraýda iz-túzsiz joǵalǵan kúzetshini tikushaqpen izdeıdi
ATYRAÝ. QazAqparat – Atyraýda eki apta buryn iz-túzsiz ketken kúzetshini tikushaqpen izdeý josparlanyp otyr, dep habarlaıdy QazAqparat oblystyq TJD-ǵa silteme jasap.
Buǵan deıin 10 naýryzda Atyraýda keshke jumysyna barý úshin úıinen shyqqan 54 jastaǵy er adam joǵalyp ketken edi.
Oblystyq Tótenshe jaǵdaılar departamenti baspasóz qyzmetinen málim etkendeı, kúzetshini izdeý sol kúni bastalyp, 11 naýryzda da jalǵasqan bolatyn. Sodan beri kúzetshi áli tabylǵan joq.
«Qutqarýshylar polıtseılermen, eriktilermen birge birneshe topqa bólinip, izdeý jumysyn júrgizdi. Jaıyq ózeniniń eki jaǵalaýyndaǵy eldi mekender, demalys bazalary men saıajaı ýchaskeleri tekserildi. Salynyp jatqan, qaraýsyz qalǵan úıler, sondaı-aq, sharýashylyq nysandary, qoqys úıindileri, ózenniń jaǵalaýy jiti qaraldy», - deıdi Órt sóndirý jáne avarııalyq-qutqarý jumystary qyzmeti basshysynyń orynbasary Samat Qumashev.
Onyń aıtýynsha, joǵalyp ketken er adamdy izdeýge Ulttyq ulannyń 60 áskerı qyzmetshisi de tartylǵan. Al, 19 naýryzda izdestirý sharasyna aýa raıy qolaıly bolsa, tikushaqty tartý josparlanyp otyr. Áýeden Atyraý qalasynyń mańyndaǵy ashyq dalaǵa sholý jasalmaq.
