Atyraýda iz-túzsiz joǵalǵan azamat Aqtóbeden tabyldy
ATYRAÝ. QazAqparat – Atyraý oblysynda byltyrǵy qańtarda iz-túzsiz joǵalǵan azamat Aqtóbe oblysynyń aýmaǵynan tabyldy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, Qyzylqoǵa aýdanyndaǵy Jasqaırat aýylynyń turǵynynan 2019 jylǵy 22 kazanda Qyzylqoǵa aýdandyq polıtsııa bólimine shaǵym túsken. Ol óziniń shaǵymynda 1979 jyly týǵan ulynyń 2019 jylǵy qańtarda úıden shyǵyp ketip, qaıta oralmaǵanyn aıtqan. Alǵashynda ata-anasy ulyn ózi keler dep kútken. Alaıda, ulynan 9 aı boıy esh habar bolmaǵan soń, aýdandyq polıtsııa bólimine aryzdanǵan.
«Aryz boıynsha polıtsııa qyzmetkerleri jan-jaqty izdestirý sharalaryn júrgizdi. Atyraý oblysynyń aýmaǵy men elimizdiń barlyq oblysy men aýdandaryna, qalalaryna izdeý týraly aqparat jiberilip, is-sharalar uıymdastyrylǵanymen, nátıje bolmady. Biraq, aýdan polıtseıleri izdestirý jumystaryn jalǵastyra berdi. Oblystyq polıtsııa departamentiniń bastyǵy Qamza Úmbetqalıev jedel keńesterde iz-túzsiz joǵalǵandardyń júrgen jerin anyqtaý, olardy taýyp, aǵaıyn-týystaryna tapsyrý boıynsha atqarylǵan is-sharalardy pysyqtap, izdestirý jumystarynyń oryndalýyn óziniń baqylaýyna aldy. Joǵalǵan qyzylqoǵalyq azamattyń deregi anyqtalmaǵany týraly ózge oblystardaǵy polıtsııa organdarynan jaýap keldi. Al Qyzylqoǵa aýdandyq polıtsııa bóliminiń jedel ýákili issaparmen kórshiles Aqtóbe oblysyna shyǵyp, sondaǵy áriptesterimen aýdan aýmaqtaryna, alys shalǵaıdaǵy eldi mekenderge bardy. Sondaı issapar kezinde habarsyz ketken azamatty Muǵaljar aýdanynyń Qaıyńdy eldi mekeniniń aýmaǵynda dalalyqta mal baǵyp júrgen jerinen tapty» dep habarlady departamenttiń baspasóz qyzmeti.
Tabylǵan azamattyń aıtýynsha, aqsha tabý maqsatymen byltyrǵy qańtarda ata-anasyna eskertpesten, Aqtóbege barǵan. Odan ári tanysyn jolyqtyryp, sol arqyly baqtashy bolǵan. Mobıldi baılanys telefonyn joǵaltyp, týystarynyń nómirlerin umytyp qalǵan.
«41 jastaǵy azamat osy kezge deıin úıine oralmaý sebebin kóbirek aqsha tapqysy kelgenimen baılanystyrdy. Bir jyldan astam merzimniń ótkenin baıqamaǵan. Al ózin eshkim kúshtep ustamaǵanyn aıtty», - dedi departamenttiń baspasóz qyzmetinen.
Ulynyń aman-esen tabylǵanyna qýanǵan 70 jastaǵy zeınetker Qyzylqoǵa aýdanynyń polıtseılerine alǵysyn bildirdi.
Eske sala ketelik, buǵan deıin Atyraý oblysynda qystaqtaǵy jasóspirimder uıaly baılanys ustaıtyn jer izdep, joǵalyp ketkenin habarlap edik.
